།།དེ་ནས་གཤེན་བུ་རྐོང་ཚ་མ་གཏོགས་པ།
།སྲས་དང་འཁོར་རྣམས་རབ་ཏུ་བྱུང་།
།གཤེན་[46]རབ་བོན་ལ་སྐུལ་པའི་རྔ།
།འབད་པ་མེད་པར་རང་གྲགས་ཏེ།
།འཁོར་རྣམས་ཐམས་ཅད་བསྡུས་པར་མཛད།
།འཁོར་བ་སྤངས་པའི་གཤེན་བརྒྱད་དང་།
།མྱ་ངན་མེད་པའི་གཤེན་བརྒྱད་དང་།
།ཞེ་དོན་སྤངས་པའི་ཞུ་བ་པོ།
།བརྒྱད་སོགས་འཁོར་རྣམས་ཐམས་ཅད་འདུས།
།གཡུང་དྲུང་བཀོད་པའི་གླིང་དུ་ནི།
།འོད་ཀྱི་ལྷ་རི་སྤོ་མཐོན་དུ།
།རིན་ཆེན་ཁྲི་སྟེང་སྟོན་པའི་གདན་བཤམས་ནས།
།ལྷ་དང་མིའི་མཆོད་པའི་ལོངས་སྤྱོད་བཤམས།
།སྟོན་པ་ཁྲི་ལ་བཞུགས་ཏེ་རྨ་ལོ་གཡུ་ལོས་བརྟེན།
།གསལ་བ་འོད་ཀྱི་འཇའ་གུར་ཕུབ།
།ན་དྲུག་རྒྱན་བཀྲ་མཚན་དཔེ་བརྗིད།
།བོན་རྣམས་ཐམས་ཅད་ཅིར་ཡང་དམིགས་སུ་མེད་པའི།
།མ་བཅོས་ཐིག་ལེ་གཅིག་ལ་མཉམ་པར་[121]བཞག
།ཚངས་པས་རིན་ཆེན་སྣ་བདུན་འཁོར་ལོ་ཕུལ།
།འགྲོ་དོན་བོན་གྱི་འཁོར་ལོ་བསྐོར་བར་བསྐུལ།
།ཨེ་མ་སྟོན་པ་ཐུགས་རྗེའི་བདག
།བོན་རྣམས་ཐམས་ཅད་མཚན་མ་མེད།
།དམིགས་པ་མེད་པའི་ཤེས་རབ་ཆེ།
།མ་བཅོས་ཐིག་ལེ་བཤད་དུ་གསོལ།
།ཅེས་ཞུས་སྟོན་པས་ཞལ་ནི་འཛུམ་པ་མཛད།
།སྟོན་མཆོག་ནམ་མཁའ་ལྟ་བུའི་ཏིང་འཛིན་གྱིས།
།སྤྱི་གཙུག་ཨུ་དུམ་ཝ་རའི་འོད་སྤྲོས་ཏེ།
།སྐུ་ལ་འོད་ཟེར་བྱེ་བ་ཁྲག་ཁྲིག་སྤྲོས་པ་ལ།
།པད་མ་འདབ་མ་སྟོང་དང་ལྡན་པས་འཇིག་རྟེན་ཁྱབ།
།བདེར་གཤེགས་སྟོང་གི་སྐུ་རུ་བཞུགས།
།བོན་འཆད་ཅིང་སྟོན་པ་ཉིད་ཀྱང་ཁམས་བརྒྱད་རབ་དབྱེ་ཞིང་།
།མཚན་མ་མེད་པ་བོན་གྱི་འཁོར་ལོ་བསྐོར།
།སྟོན་པ་ཞལ་གྱི་དཀྱིལ་འཁོར་ནས།
།འཕྲུལ་གྱི་ལྗགས་ནི་བརྐྱངས་མཛད་དེ།
།ཚངས་པའི་གསུང་ནི་སྙན་པ་ཡིས།
།སྟོང་གསུམ་[122]འཇིག་རྟེན་ཀུན་བཀང་ནས།
།བདུད་ལྔ་དུག་ལྔ་འདུལ་ཕྱིར་དུ།
།འཕྲུལ་ངག་བདེན་པའི་བོན་བཤད་པ༑
༑ཀྱེ་མ་འདུས་པའི་འཁོར་རྣམས་རབ་ཏུ་ཉོན།
།འབྱུང་བ་ཆེན་པོ་ལྔ་རྣམས་དང་།
།ཕུང་པོ་ལྔ་དང་ཁམས་བརྒྱད་དང་།
།སྐྱེ་མཆེད་བཅུ་གཉིས་རྟེན་འབྲེལ་འབྱུང་།
།གཤེན་རབ་ས་དང་ལམ་ལྔ་དང་།
།འཁོར་བ་མྱ་ངན་འདས་པའི་བོན།
།ཐམས་ཅད་མཚན་མ་མེད་པ་སྟེ།
།ཅིར་ཡང་དམིགས་སུ་མེད་པའོ།
།མ་བཅོས་ཐིག་ལེ་གཅིག་ལ་བཞག་པར་གྱིས།
།ཨ་ནི་མ་བཅོས་ཐིག་ལེ་འོ༑
༑ཨ་ལས་ཡིག་འབྲུ་ཐམས་ཅད་བྱུང་།
།མ་སྐྱེས་སྐྱེ་མེད་རྣམ་པར་དག
།ཅེས་གསུངས་འཁོར་རྣམས་ཤེས་ཐག་ཆོད།
།དེ་ནས་བརྒྱ་བྱིན་ལྷ་ཡིས་བདུད་རྩི་ཕུལ།
།སྟོན་པ་ལ་ནི་ཞུས་པའི་མདོ།
།ཀྱེ་མ་གཤེན་རབ་སྟོན་པའི་མཆོག
།སྲིད་པའི་བོན་གྱི་རྣམ་གྲངས་དང་།
།རང་བཞིན་དག་པའི་བོན་རྣམས་གང་།
།ཞེས་[123]ཞུས་སྟོན་པས་བཀའ་བསྩལ་བ།
།ཉོན་ཅིག་ལྷ་ཡི་དབང་པོ་ཉོན།
།རིང་[47]བཞིན་ཡེ་ནས་སྲིད་པ་དང་།
།རྫུ་འཕྲུལ་བྱེད་པས་བྱས་པ་དང་།
།རྒྱུ་མཐུན་སོ་སོར་འབྱུང་བ་དང་།
།སྟོབས་ལྡན་རྩལ་ཤུགས་དབང་གིས་སྲིད་པ་དང་།
།དགེ་སྡིག་རྣམས་ནི་སྲིད་པ་དང་།
།དྲི་ཟ་ཉེ་བར་འཁོར་བ་དང་།
།སྒྱུ་མ་ལྟ་བུའི་ཐང་དང་ཡུད་བྱུང་བའི་སྲིད་པའོ།
།དེ་ལ་བོན་གྱི་རྣམ་གྲངས་ནི།
།འདུས་བྱས་འཁོར་བའི་བོན་རྣམས་དང་།
།འདུས་མ་བྱས་པ་མྱ་ངན་ལས་འདས་པའི་བོན།
།ཐུགས་རྗེ་རྒྱ་ཆེན་པོའི་བོན་རྣམས་དང་།
།འཕྲུལ་ངག་བདེན་པའི་བོན།
སྲིད་པར་རྒྱུད་པའི་བོན།
།དགེ་སྡིག་འབྱེད་པའི་བོན།
།སྟོན་པའི་བཀའ་ནི་གནམ་བབ་བོན།
།རང་ཤར་རིག་པ་རང་རྡོལ་བོན།
།རྒྱུ་མཐུན་རང་ལུགས་བོན།
།རྡོ་ཤིང་རང་འགྱུར་བོན།
།སྐྱེ་མེད་གདོད་ནས་དག་པའི་བོན།
།སྣང་མེད་དཔེ་ལས་འདས་པའི་བོན།
།ཚད་མེད་ལྷུན་[124]ལ་རྫོགས་པའི་བོན།
།ཟད་མེད་གཡུང་དྲུང་དབྱིངས་སུ་གནས་པའི་བོན།
།རྩོལ་མེད་ལྷུན་གྱིས་གྲུབ་པའི་བོན།
།འགྱུར་མེད་གཡུང་དྲུང་ཐོབ།
།འཆི་མེད་སྐྱེས་ནས་བརྩན།
།ཆགས་མེད་རྣམ་པར་དག
།རིས་མེད་ཡོངས་ལ་ཁྱབ།
།ཉིད་ལ་ཅིར་ཡང་སྤྲུལ་པའི་སྐུ།
།བྱེ་བ་ཕྲག་བརྒྱ་འབྱུང་བ་ནི།
།འགག་པ་མེད་པར་གཞན་དོན་མཛད།
།ལྷ་དབང་བོན་རྣམས་ཤེས་པར་གྱིས།
།ཞེས་གསུངས་ལྷ་དབང་དགའ་བ་ཐོབ།
།དེ་ནས་གཤེན་རབ་སྟོན་པ་ལ།
།གསལ་བ་ལེགས་གྲུབ་ཀྱིས་ཞུས་པ།
།སྟོན་མཆོག་ཐམས་ཅད་ཀུན་འབྱེད་པ།
།ཕུང་པོ་ལྔ་གནས་བཤད་དུ་གསོལ།
།དེ་ནས་སྟོན་པས་རྣམ་གྲངས་བཤད་པས།
།ཕུང་བོ་རྣམ་པ་གཉིས་ཏེ།
།ཟག་བཅས་དང་ནི་ཟག་མེད་དོ།
།ཟག་མེད་ཕུང་བོ་རྣམ་ལྔ་ནི།
།ཚུལ་ཁྲིམས་ཉིས་བརྒྱ་ལྔ་བཅུ་ནི།
།ཟག་མེད་ཚུལ་ཁྲིམས་ཕུང་བོའོ།
[125]།ཏིང་འཛིན་ཡན་ལག་དྲུག་ཅུ་ནི༑
༑ཟག་མེད་ཏིང་འཛིན་ཕུང་བོའོ།
།མི་དམིགས་ཤེས་རབ་རྣམ་པ་དགུ།
།ཟག་མེད་ཤེས་རབ་ཕུང་བོའོ།
།རྣམ་པར་གྲོལ་བའི་ཡན་ལག་བརྒྱད།
།ཟག་མེད་རྣམ་གྲོལ་ཕུང་བོའོ།
།རྣམ་གྲོལ་ཡེ་ཤེས་གསལ་མཐོང་དྲུག
།ཟག་མེད་རྣམ་གྲོལ་ཡེ་ཤེས་ཕུང་བོའོ།
།ཟག་བཅས་ཕུང་བོ་རྣམ་ལྔ་ནི།
།གཟུགས་དང་། ཚོར་བ་དང་།
འདུ་ཤེས་དང་། འདུ་བྱེད་དང་།
རྣམ་ཤེས་ཕུང་པོའོ།
།གཟུགས་ཀྱི་ཕུང་པོ་གསུམ་ཡིན་ཏེ།
།རྒྱུའི་གཟུགས་ནི་འབྱུང་བ་བཞི།
།འབྲས་བུའི་གཟུགས་ནི་ཡུལ་ལྔ་དབང་པོ་ལྔ།
།རྣམ་པར་རིག་བྱེད་མ་ཡིན་བཟོད་རྩོལ་དང་།
།ཚོར་བ་བདེ་སྡུག་བཏང་སྙོམས་གསུམ།
།འདུ་ཤེས་རྒྱ་ཆེ་[126]ཆུང་ཚད་མེད་གསུམ།
།འདུ་བྱེད་ལྔ་བཅུ་རྩ་གཅིག་སྟེ།
།རྣམ་ཤེས་ཕུང་པོ་རྣམ་ཤེས་དྲུག
།མིག་དང་རྣ་བ་སྣ་ལྕེ་ལུས་ཡིད་དོ།
།ཕུང་པོ་དེ་ལྟར་ཤེས་པར་མཛོད།
།རང་[48]བཞིན་མཚན་མ་མེད་པའོ།
།ཞེས་གསུངས་ཕུང་པོའི་གནས་ལུགས་སོ།
།དེ་ནས་སྟོན་པ་གཤེན་རབ་ཉིད།
།འོད་ཀྱི་ལྷ་རི་སྤོ་མཐོན་རྩེར།
།འཕྲུལ་སྣང་འོད་ཀྱི་གཞལ་ཡས་སུ།
།སེང་གེ་ཉི་ཟླའི་གདན་སྟེང་དུ།
།མི་གཡོ་མཉམ་པར་དཀྱིལ་ཀྲུང་བཞུགས།
།འཁོར་གཡུང་དྲུང་སེམས་དཔའ་ལྔ་བརྒྱ་དང་།
།ཡེ་གཤེན་སུམ་བརྒྱ་དྲུག་ཅུས་བསྐོར་དེ་བཞུགས།
།འདུས་པའི་འཁོར་གྱི་ནང་ནས་ཀྱང་།
།ཡིད་ཀྱི་ཁྱེའུ་ཆུང་གཏོ་བུ་འབུམ་སངས་དང་།
།མེད་ཁམས་སྟོང་པ་རྗེ་དང་།
གསལ་བ་འོད་ལྡན་དང་།
ཚངས་པ་གཙུག་[127]ཕུད་དང་།
ཀླུ་མོ་མ་མ་དེ་དང་།
གཡུང་དྲུང་གཙུག་གཤེན་རྒྱལ་བ་དང་།
།གསང་བ་ངང་རིང་རྣམས་བརྒྱད་ཀྱིས་མགྲིན་གཅིག་ཏུ་སྟོན་པ་ལ།
མཚན་མ་མེད་པའི་དོན་ཞུས་པ།
།ཀྱེ་མ་སྟོན་པ་ཐམས་ཅད་མཁྱེན།
།བོན་རྣམས་ཀུན་གྱི་ངོ་བོ་ཉིད།
།མཚན་མ་མེད་པ་བཤད་དུ་གསོལ།
།ཅེས་ཞུས་སྟོན་པས་བཀའ་བསྩལ་བ།
།བོན་རྣམས་ཐམས་ཅད་སྤྲོས་པ་ཡི།
།མཚན་མ་ཀུན་དང་རྣམ་བྲལ་བ།
།རྣམ་པར་རྟོག་པ་ཅི་ཡང་མེད།
།མཉམ་ཉིད་ངང་ལ་འདུས་པ་དེ།
།ང་ཡིས་བཤད་ཀྱིས་རབ་ཏུ་ཉོན།
།ཀྱེ་མ་གཡུང་དྲུང་སེམས་དཔའ་རྣམས།
།བོན་རྣམས་ཀུན་གྱི་ངོ་བོ་ཉིད།
།ཅིར་ཡང་དམིགས་སུ་མེད་པ་སྟེ།
།མ་བཅོས་ཐིག་ལེ་གཅིག་ལ་བཞག་པར་གྱིས།
།གཟུགས་དང་ཚོར་བ་འདུ་ཤེས་དང་།
།འདུ་བྱེད་རྣམ་པར་ཤེས་པ་དང་།
།མིག་དང་རྣ་བ་སྣ་དང་ལྕེ།
།ལུས་དང་ཡིད་ཀྱི་རྣམ་ཤེས་དང་།
།གཟུགས་[128]སྒྲ་དྲི་རོ་རེག་བྱའི་བོན་རྣམས་ཀྱི།
།ངོ་བོ་ཉིད་ནི་དམིགས་སུ་མེད་པ་སྟེ།
།མ་བཅོས་ཐིག་ལེ་གཅིག་ལ་བཞག་པར་བྱ།
།ས་ཆུ་མེ་རླུང་ནམ་མཁའི་ཁམས།
།ངོ་བོ་ཉིད་ནི་ཅིར་ཡང་དམིགས་སུ་མེད་པ་སྟེ།
།མ་བཅོས་ཐིག་ལེ་གཅིག་ལ་བཞག་པར་བྱ།
།མ་རིག་འདུ་བྱེད་རྣམ་ཤེས་དང་།
།མིང་དང་གཟུགས་དང་སྐྱེ་མཆེད་དྲུག
།རེག་པ་ཚོར་བ་སྲེད་ལེན་དང་།
།སྲིད་པ་སྐྱེ་བ་རྒ་ཤི་ལ་སོགས་འཁོར་བ་ཡི།
།བོན་རྣམས་ངོ་བོ་ཉིད་ནི་ཅིར་ཡང་དམིགས་སུ་མེད་པ་སྟེ།
།མ་བཅོས་ཐིག་ལེ་གཅིག་ལ་བཞག་པར་བྱ།
།སྦྱིན་པ་ཚུལ་ཁྲིམས་བཟོད་པ་དང་།
།བསམ་གཏན་ཐབས་དང་སྟོབས་དང་སྨོན་ལམ་དང་།
།ཡེ་ཤེས་ཤེས་རབ་བླ་མེད་ཕྱིན་པ་ཡི།
།ངོ་བོ་ཉིད་ནི་ཅིར་ཡང་དམིགས་སུ་མེད་པ་སྟེ།
།མ་བཅོས་ཐིག་ལེ་གཅིག་ལ་བཞག་པར་བྱ།
།དྲན་པ་ཉེ་བར་བཞག་པ་བཞི་དང་།
།ཡང་དག་པར་སྤོང་པ་བཞི།
།རྫུ་འཕྲུལ་གྱི་རྐང་བ་བཞི་དང་།
།དབང་པོ་ལྔ་དང་།
[129]ཏིང་ངེ་འཛིན་དང་ནི་ཡེ་ཤེས་ཤེས་རབ་ལམ།
།སྟོབས་དང་མི་འཇིགས་ཐར་ལམ་བརྒྱད།
།ལན་ཅིག་ཕྱིར་མི་འོང་དང་ཕྱིར་མི་ལྡོག
།རྒྱུན་[49]དུ་ཞུགས་དང་གཡུང་དྲུང་ཡན་ལག་དགུ།
།ཚད་མེད་བཞི་དང་མ་འདྲེས་དགུ།
།སོ་སོ་ཡང་དག་རིག་པ་དང་།
།མི་བསྙེལ་གཟུངས་དང་སྙོམ་འཇུག་དགུ།
།མཚན་མ་མེད་པ་བཞི་དང་སྙོམ་པ་བཞི།
།བོན་གྱི་དབྱིངས་དང་རྒྱུན་དུ་གནས་པའི་ཐུགས་རྗེ་དང་།
།རྟོགས་པ་ཆེན་པོའི་ལྟ་བ་དང་།
།བསྲུང་དུ་མེད་པའི་དམ་ཚིག་དང་།
།ལྷུན་གྱིས་གྲུབ་པའི་འཕྲིན་ལས་དང་།
།རྣམ་པར་དག་པའི་སྤྱོད་པ་དང་།
།ལེགས་པར་འབྱུང་བའི་ཡོན་ཏན་དང་།
།སྙོམས་པར་གནས་པའི་ངང་ཉིད་དང་།
།འགྱུར་བ་མེད་པའི་སྐུ་དང་།
།རང་བཞིན་མེད་པའི་གསུང་དང་།
།མཉམ་ཉིད་འཁྲུལ་པ་མེད་པའི་ཐུགས་དང་།
།ཐམས་ཅད་མཁྱེན་པའི་ཡེ་ཤེས་དང་།
།བླ་མེད་འབྲས་བུ་ལ་སོགས་པ།
[130]།མྱ་ངན་འདས་པའི་བོན་རྣམས་ཀྱི།
།ངོ་བོ་ཉིད་ནི་དམིགས་སུ་མེད་པ་སྟེ།
།མ་བཅོས་ཐིག་ལེ་གཅིག་ལ་བཞག་པར་བྱ།
།ཞེས་གསུངས་ཁམས་བརྒྱད་གཏན་ལ་ཕབ།
།དེ་ལྟར་མཚན་མ་མེད་པའི་ཁམས་ཆེན་པོ་གསུངས་སོ།
།དེ་ནས་ཕོ་གླིང་མོ་གླིང་དུ།
འདུལ་བ་རྒྱུད་དྲུག་བཤད་པ།
སོ་སོའི་གླིང་དུ་མདོ་སྡེ་བཤད།
།བདུད་འདུལ་གླིང་དུ་སྔགས་བཤད་དོ།
།གཡུང་དྲུང་ལྷ་ཡི་བོན་མདོ་འདུས་པ་རིན་པོ་ཆེའི་རྒྱུད་ལས།
སྟོན་པས་བོན་གྱི་འཁོར་ལོ་བསྐོར་བའི་ལེའུ་སྟེ་བཅུ་བཞི་བའོ།།
གངས་ཏི་སེ་བོན་གཞུང་རིག་མཛོད་ལྟར་སྐྲུན་པ།
ཤོག་གྲངས་ནི།
Bon
Foundation བོན་བཀའ་འགྱུར་ལ་པོད་སུམ་བཅུ་པ་ནས།
ཨང་ཀི་དམར་པོ།
(Si
khron zhing chen par khrun lte gnas par 'debs khang, Chengdu 1999)
གངས་ཏི་སེ་བོན་གཞུང་རིག་མཛོད་ལ་དེབ་དང་པོ་ནས།
ཨང་ཀི་སྔོན་པོ།
(Gangs
ti se bon gzhung rig mdzod, Amdo 2009)
Brak komentarzy:
Prześlij komentarz