(16) མདོ་འདུས་ལས། ལེའུ་བཅུ་དྲུག་པ། མཛོད་གནས་བསྟན་པ།

[141]།།དེ་ནས་སྟོན་པ་གཤེན་རབ་ལ། །རྨ་ལོ་གཡུ་ལོས་ཞུས་པའི་མདོ། །ཏི་ཀ་རྒྱ་སེ་ལིག་མིན་ཏ༑ ༑སྲིད་པའི་མཛོད་ཕུག་ཇི་ལྟར་ལགས། །ཐམས་ཅད་མཁྱེན་པས་བཤད་དུ་གསོལ། །ཅེས་ཞུས་སྟོན་པས་བཀའ་བསྩལ་བ། །ཀྱེ་མ་རྨ་ལོ་གཡུ་ལོ་ཉོན། །ཡོད་པ་མེད་པ་མི་གཡོ་གསལ། །ཀུན་གནས་སྐྱེ་འཕེལ་གཅོད་བྱེད་འཕྲ་རྒྱས་དང་། །རྟེན་འབྲེལ་འདུས་པའི་མངོན་རྟོགས་རྒྱ་ཆེའོ། །རང་འཛིན་ལས་སྤྱོད་འགྲོ་བ་ས་གནས་གྲུབ་འབྲས་སོ། །དེ་ལྟར་མཛོད་གནས་བཅུ་བདུན་གསལ། །ཞེས་གསུངས་སྲས་ཀྱིས་ཡང་ཞུས་པ། །ཐམས་ཅད་མཁྱེན་པས་མཛོད་བཤད་ནས། །མཛོད་གནས་རབ་ཏུ་དབྱེ་བར་ཞུ། །ཞེས་ཞུས་སྟོན་པས་བཀའ་བསྩལ་བ། །ཉོན་ཅིག་མཛོད་གནས་རིམ་པར་བྱེད། །ཡོད་པ་སྲིད་པ་གསུམ་གྱི་མཛོད། །མེད་པ་བསྐལ་དགུ་ཡི་མཛོད། །མི་གཡོ་དབྱིངས་ནི་བཞི་ཡི་མཛོད། །གསལ་བ་ཡེ་ཤེས་ལྔ་ཡི་མཛོད། །ཀུན་གནས་སྣོད་ནི་[142]བཞི་ཡི་མཛོད། །སྐྱེ་འཕེལ་བཅུ་ནི་གསུམ་གྱི་མཛོད། །གཅོད་བྱེད་དབང་པོ་ལྔའི་མཛོད། །འཕྲ་རྒྱས་དུག་ནི་གསུམ་གྱི་མཛོད། །རྟེན་ཅིང་འབྲེལ་བ་གཉིས་ཀྱི་མཛོད། །འདུས་པ་ཕུང་པོ་གཉིས་ཀྱི་མཛོད། །མངོན་རྟོགས་སྐྱེ་མཆེད་དྲུག་གི་མཛོད། །རྒྱ་ཆེ་ཁམས་ནི་གསུམ་གྱི་མཛོད། །རང་འཛིན་མཚན་ཉིད་གཉིས་ཀྱི་མཛོད། །ལས་དང་སྤྱོད་པ་ལྔ་ཡི་མཛོད། །འགྲོ་བའི་ལམ་ནི་བཞི་ཡི་མཛོད། །ས་དང་གནས་ནི་གསུམ་གྱི་མཛོད། །གྲུབ་པའི་འབྲས་བུ་བཞི་ཡི་མཛོད། །དེ་ལྟར་མཛོད་གནས་བཅུ་བདུན་ཡང་། །རེ་རེ་རྐྱང་པ་གོ་རིམ་བསྟེན། །ཡོད་པ་སྲིད་པ་གསུམ་པོ་ནི། །སྐྱེ་དང་འཆི་དང་སྲིད་པ་བར་དོ་གསུམ། །རྒྱུ་བཞི་རྐྱེན་དང་ལྔ་ལས་བྱུང་། །མེད་པ་བསྐལ་པ་རྣམ་དགུ་ནི། །ནད་མུག་མཚོན་དང་གསུམ། །མེ་ཆུ་རླུང་དང་གསུམ། །འཇིག་ཆགས་སྟོང་དང་གསུམ། །མི་གཡོ་[54]དབྱིངས་ནི་རྣམ་བཞི་ནི། །མུ་བཞི་སྐྱེ་མེད་འགག་[143]མེད་གནས་མེད་དེ། །གསལ་བ་ཡེ་ཤེས་ལྔ་མཛོད་ནི། །མེ་ལོང་མཉམ་ཉིད་སོར་རྟོག་བྱ་བ་གྲུབ། །བོན་དབྱིངས་ཡེ་ཤེས་གསལ་བའོ། །ཀུན་གནས་སྣོད་ནི་རྣམ་བཞི་ནི། །རླུང་དང་ཆུ་དང་ས་རི་རབ། །སྐྱེ་འཕེལ་བཅུད་ནི་རྣམ་གསུམ་སྟེ། །འབྱུང་ལྔའི་བཅུད་དང་། །ཡེ་ཤེས་ལྔའི་བཅུད། །འདོད་ཆགས་སྐྱེད་པ་དྲུག་གོ །གཅོད་བྱེད་དབང་པོ་རྣམ་ལྔ་ནི། །མིག་དང་རྣ་བ་སྣ་དང་ལྕེ། །ལུས་ཀྱི་དབང་པོ་རྣམ་ལྔའོ། །འཕྲ་རྒྱས་དུག་གསུམ་བྱ་བ་ནི། །འདོད་ཆགས་ཞེ་སྡང་གཏི་མུག་གོ །རྟེན་ཅིང་འབྲེལ་བ་རྣམ་གཉིས་ནི། །ལུགས་འབྱུང་མ་རིག་རྒ་ཤི་མཐའ། །བཅུ་གཉིས་བཟློག་པས་ལུགས་བཟློག་གོ །འདུས་པ་ཕུང་པོ་རྣམ་གཉིས་ནི། །ཟག་བཅས་ཕུང་པོ་རྣམ་ལྔ་དང་། །ཟག་མེད་ཕུང་པོ་རྣམ་ལྔའོ། །མངོན་རྟོགས་སྐྱེ་མཆེད་རྣམ་དྲུག་ནི། །རྣམ་པར་ཤེས་པ་དྲུག་པོ་ནི། །ཡུལ་ལ་སྐྱེ་ཞིང་མཆེད་པའོ། །རྒྱ་[144]ཆེ་ཁམས་ནི་རྣམ་གསུམ་ནི། །འབྱུང་བ་དབང་པོ་སེམས་ཅན་ཁམས། །འདོད་ཁམས་གཟུགས་ཁམས་གཟུགས་མེད་དོ། །རང་འཛིན་མཚན་ཉིད་རྣམ་གཉིས་ནི། །འཁོར་བ་དང་ནི་མྱ་ངན་འདས། །ལས་དང་སྤྱོད་པ་རྣམ་ལྔ་ནི། །ལས་ནི་དགེ་དང་མི་དགེ་གཉིས། །སྤྱོད་པ་ཉལ་འདུག་འགྲོ་འཆག་ཤེས་པར་བྱ༑ ༑འགྲོ་བའི་ལམ་ནི་རྣམ་བཞི་ནི། །འཁོར་བ་མེད་པའི་ལམ། །རང་གི་རང་བཞིན་དགའ་བའི་ལམ། །དེ་བཞིན་འཁོར་བ་རྒྱུད་པའི་ལམ། །ཐུགས་རྗེ་མཐོ་རིས་ཐར་ལམ་མོ། །ས་དང་གནས་ནི་གསུམ་པོ་ནི། །ཁམས་གསུམ་འཁོར་བའི་ས་དགུ་དང་། །གཡུང་དྲུང་ཐེག་པའི་ས་བཅུ་དང་། །བོན་ཉིད་མཆོག་ཆེན་ས་དག་གོ །གྲུབ་པའི་འབྲས་བུ་རྣམ་བཞི་ནི། །རྒྱུ་མཐུན་པའི་འབྲས་བུ་དང་། །དབང་གི་འབྲས་བུ་དང་། །རྣམ་སྨིན་འབྲས་བུ་དང་། །བླ་ན་མེད་པའི་འབྲས་བུའོ། །མཛོད་གནས་བཅུ་བདུན་རྣམ་དབྱེ་བ། །ནམ་མཁའ་ལྟ་བུ་གོ་བྱེད་ཤེས། །མི་ཤེས་མུན་བསལ་[145]ཡེ་ཤེས་གཏན་ལ་ཕབ། །ཤེས་རབ་ཞིབ་པས་གཞིགས་ཏེ་སྤྱོད། །གཡུང་དྲུང་དག་པའི་བོན་མདོ་འདུས་པ་རིན་པོ་ཆེའི་རྒྱུད་ལས། མཛོད་གནས་ལེའུ་སྟེ་བཅུ་དྲུག་པའོ།། 

གངས་ཏི་སེ་བོན་གཞུང་རིག་མཛོད་ལྟར་སྐྲུན་པ།

ཤོག་གྲངས་ནི།

Bon Foundation བོན་བཀའ་འགྱུར་ལ་པོད་སུམ་བཅུ་པ་ནས། ཨང་ཀི་དམར་པོ། (Si khron zhing chen par khrun lte gnas par 'debs khang, Chengdu 1999)

གངས་ཏི་སེ་བོན་གཞུང་རིག་མཛོད་ལ་དེབ་དང་པོ་ནས། ཨང་ཀི་སྔོན་པོ། (Gangs ti se bon gzhung rig mdzod, Amdo 2009)

⋘ ● ⋙