།།དེ་ནས་སྟོན་པ་གཤེན་རབ་ལ།
།གཤེན་ཟ་ནེའུ་ཆུང་གིས་ཞུས་པ།
།མཆོད་པ་ཕུལ་ནས་ཞུས་པའི་མདོ།
།ཨེ་མ་ཡབ་གཅིག་གཤེན་རབ་མཆོག
།དཔའ་བརྟན་འགྱུར་མེད་ཐམས་ཅད་མཁྱེན།
།རྒྱལ་པོན་མྱེས་ཀྱི་ས་ཡང་ནོན།
།ཐུགས་རྗེ་འགྲོ་དོན་མཛད་ལ་བསྟོད།
།བདག་ནི་ཁྱབ་པས་བློ་བརྐུས་སྟེ།
[90]།ལན་ཅིག་འཁྲུལ་པས་བློ་རེ་འགྱོད།
།སྟག་བུ་ཐུང་དང་གཟིག་བུ་ཐུང་།
།ལས་ངན་འབྲེལ་པས་སྙིང་རེ་རྗེ།
།ལན་ཆགས་འཇལ་ཏེ་ནུ་མ་བྱིན།
།འདི་ཡི་ལས་འབྲེལ་ཇི་ལྟར་ལགས།
།དང་པོ་བདུད་རྣམས་གང་ནས་བྱུང་།
།བར་དུ་བདུད་དེ་གང་དུ་གནས།
།སྟོན་པའི་བདེན་པར་བར་ཆད་ཅི།
།ཐ་མར་བདུད་རྣམས་ཇི་ལྟར་གྱུར།
།ཅེས་ཞུས་སྟོན་པས་བཀའ་བསྩལ་བ༑
༑ནེའུ་ཆུང་ལ་སོགས་འཁོར་རྣམས་ཉོན།
།གཤེན་གྱི་ཐུགས་ལ་འཁྲུལ་པ་མེད།
།མངོན་ཤེས་གསལ་བས་བསླུ་མི་ནུས།
།བདེན་པའི་དོན་ལ་རྫུན་པ་མེད།
།ཉི་མའི་དཀྱིལ་ན་མུན་པ་མེད།
།སྐྱེ་འགྲོ་རླུང་ལ་མི་བརྟེན་མེད།
།སྲོག་ཆགས་ཆུ་ལ་མི་འཐུང་མེད།
།བདེར་གཤེགས་བཀའ་ལ་མི་ཉན་མེད།
།གཡུང་དྲུང་བོན་ལ་མི་སྤྱོད་མེད།
།བསླུ་བའི་ཁ་ལ་ཉན་པ་མེད།
།གཤེན་རབ་གཅིག་པུར་མངོན་སངས་རྒྱས།
།ཁྱབ་པས་[91]འགྲན་ཏེ་དོ་བསྡོས་ནས།
།བདག་གི་འགྲན་ཟླར་སོང་བ་ཡིན།
།ནེའུ་ཆུང་བདུད་ཀྱིས་བསླུས་པ་དེ།
།སྔོན་གྱི་བཟའ་འབྲེལ་སྨོན་ལམ་ཡོད།
།སྟག་བུ་གཟིག་བུ་ཡོད་[36]པ་དེ།
།ཁྲའོ་རྒོད་དང་ཁྲ་མོ་རྒོད།
།སྔ་མའི་བཟའ་འབྲེལ་ཡོད་པ་ཡིན།
།དང་པོ་བདུད་རྣམས་གང་ནས་བྱུང་།
།མ་རིག་མ་རྟོགས་རྒྱུད་ལས་བྱུང་།
།བདུད་ལ་རྣམ་པ་ལྔ་ཡོད་དེ།
།ཀུན་ནས་ཉོན་མོངས་པ་ཡི་བདུད།
།ཕུང་པོ་ཉེ་བར་ལེན་པའི་བདུད།
།འཆི་བདག་ལས་བཙན་དག་གི་བདུད།
།སྒྱུ་མ་འཁྲུལ་པ་གཟུགས་བརྙན་བདུད།
།ལྷ་ཡི་བུ་ཡི་བདུད་དང་ལྔ།
།དེ་ཡང་ཉོན་མོངས་བདུད་ལ་ལྔ།
།འདོད་ཆགས་ཆུ་བོ་བདུད།
།ཞེ་སྡང་མེ་འབར་བདུད།
།གཏི་མུག་མུན་འཐིབ་བདུད།
།ང་རྒྱལ་བྲག་རིའི་བདུད།
།ཕྲག་དོག་[92]རླུང་འཚུབ་བདུད་དག་གོ
།ཉོན་མོངས་བདུད་ཀྱིས་བཞེན་བཏབ་པས།
།ཕུང་པོ་ལྔ་ནི་ཉེ་བར་བླངས།
།ཟག་བཅས་ཕུང་པོ་རྣམ་ལྔ་ལ།
།མངོན་པར་ཞེན་པ་ཕུང་པོའི་བདུད།
།སྔ་མའི་ལས་དང་ཕྱི་མའི་ལས།
།སྲོག་ནི་རྐྱེན་ཀྱིས་འགག་པ་ལ།
།འཆི་བདག་ལས་བཙན་བདུད་ཅེས་བྱ།
།འདོད་པའི་ཡོན་ཏན་ལྔ་རྣམས་ནི།
།སྒྱུ་མ་ཡིན་ཏེ་དེ་ལ་ཞེན།
།སྒྱུ་མ་གཟུགས་བརྙན་བདུད་དག་གོ
།ཁྱབ་པ་སྒྱུ་མ་གཟུགས་བརྙན་བདུད།
།ཚངས་རིས་མ་མཐའི་བྱང་ཕྱོགས་ནས།
།བདུད་ཡུལ་མུན་པའི་གླིང་ཆེན་ནས།
།བདུད་ནི་དགའ་རབ་དབང་ཕྱུག་བུ།
།བདུད་ནི་རྒྱ་ལག་ཐོད་རྗེ་དང་།
།ཆུང་མ་གཏུམ་མོ་དུག་འཐུང་ལ།
།བུ་ནི་བདུད་རྗེ་ཁྱབ་པ་ལག་རིང་བྱུང་།
སྲིན་མོ་ཁྲག་འཐུང་སྙིང་རིང་བླངས།
།བུ་བདུད་ཕྲུག་འཇིག་རྟེན་སྐྱོང་བ་བཞི།
།འཐབ་བྱེད་ཆགས་བྱེད་གཡེང་བྱེད་དང་།
།རྨོངས་བར་བྱེད་པ་དང་བཞིའོ།
[93]།མཚོན་དུ་འདོད་པའི་མདའ་ལྔ་ཐོགས།
།སྲིང་མོ་འདོད་པའི་དྲུག་འགྱུར་དྲུག
།གཡོ་སྒྱུ་སུམ་ཅུ་རྩ་གཉིས་འཆང་།
།འཁོར་ནི་བདུད་བྱེ་བ་དགུ་ཁྲིར་བཅས།
།དེ་ནི་བདུད་ཀྱི་བྱུང་ཁུངས་ལགས།
།དེ་ལ་བདུད་ཀྱི་གནས་པ་ནི།
།འཇིག་རྟེན་དྲེགས་དང་སྒྲིབ་པ་ཅན།
།མི་དགེ་ལོག་པར་སྤྱོད་རྣམས་ལ།
།དེ་ལ་བདུད་ནི་རྟག་ཏུ་གནས།
།འཇིག་པ་ཕུང་བོ་རྟེན་ལ་རྣམ་ཤེས་སོ།
།དྲེག་ནི་དུག་དྲེག་དུག་ལྔས་དྲེགས་པའོ།
།སྒྲིབ་པ་རྣམ་པ་གསུམ་ཡིན་ཏེ།
།ཉོན་མོངས་སྒྲིབ་དང་ལས་ཀྱི་སྒྲིབ།
།ཤེས་བྱའི་སྒྲིབ་པ་ཅན་ལ་ནི།
།བདུད་ནི་ལྔ་པོ་རྟག་ཏུ་གནས།
།སྟོན་པའི་བདེན་པར་བར་ཆོད་ནི།
།སྔོན་གྱི་ལས་ཀྱིས་འབྲེལ་པ་སྟེ།
།རྒྱལ་པོ་ཀ་དྷ་ལ་གསེར་འོད་དང་།
།ཀླུ་མོ་མ་དེ་ལ་སྐྱེས།
།བུ་རྒ་རྒྱ་དལ་འབྱོར་སྐྱེས་དང་ནི།
།རབ་གསལ་རྟུལ་ཤུགས་ཅན་དང་[94]བཞི།
།གཅེན་གསུམ་བྲག་ཀ་དྲི་ལ་ཤེལ་གྱི་བྲག་ཕུག་ཏུ་སྒོམ།
།གཅུང་པོས་རྒྱལ་ས་བཟུང་པ་ལ།
།ཡབ་ཀྱིས་རྒྱལ་སྲིད་གསུམ་དུ་བགོས།
།ཆ་གཅིག་གཅེན་གསུམ་བསྒོམ་བརྒྱག་གྱིས།
།ཆ་གཅིག་གཅུང་གིས་རྒྱལ་སྲིད་[37]གྱིས།
།ཆ་གཅིག་གཞན་ལ་སྦྱིན་པ་ཐོངས།
།ཞེས་བྱས་གཅུང་གིས་མ་བྱིན་ཏེ།
།མུ་གེ་བྱུང་དུ་མཁར་དུ་ཞེན།
།དེར་འབངས་ཀྱིས་རྒྱལ་བུ་མདའ་ཡིས་བསད།
།ཕུ་བོ་གསུམ་གྱིས་བདུད་གྱུར་དམོད།
།གཅེན་གསུམ་དུས་གསུམ་གཤེན་རབ་གྱུར།
།གཅུང་བོ་བདུད་རྗེ་ཁྱབ་པའོ།
།དེ་ཕྱིར་ལས་ཀྱིས་འབྲེལ་པའོ།
།ཡང་སྟོན་པའི་བདེན་པར་བར་ཆོད་ནི།
།སྟོན་པ་བདེ་བར་གཤེགས་པ་ལ༑
༑བདུད་ཀྱིས་བར་ཆོད་མི་སྲིད་དོ།
།བདེན་པའི་བོན་ནི་གཡུང་དྲུང་བོན།
།དེ་ལ་བདུད་ཀྱི་ལས་འབྲས་དེ།
།གཡུང་དྲུང་བོན་ལ་སྤྱོད་པ་ཡི།
།འགྲོ་བ་རྣམས་ལ་བར་ཆོད་དེ།
།འགྲོ་བ་འཁྲུལ་པས་རང་བདུད་བྱེད།
།ཉོན་མོངས་[95]སྒྲིབ་པས་སྒྲིབ་པ་ལ།
།བདུད་ཀྱི་འདོད་པའི་མདའ་ལྔ་ཕོག
།ལས་ཀྱི་སྒྲིབ་པས་བསྒྲིབས་པ་ལ།
།བདུད་ཀྱིས་འཇིག་རྟེན་སྐྱོང་བཞི་བསྲུང་།
།ཤེས་བྱའི་སྒྲིབ་པས་བསྒྲིབས་པ་ལ།
།ལྷ་ཡི་བུ་ཡི་བདུད་ཀྱིས་བསླུས།
།མདའ་ལྔ་ཕོག་པ་ཉོན་མོངས་བདུད།
།འཇིག་རྟེན་སྐྱོང་བཞི་བསྲུངས་པ་ཕུང་བོ་བླངས།
།ཆགས་ཤིང་ཞེན་པ་ཕུང་བོའི་བདུད།
།ཡང་ཡང་ཕུང་པོ་ཉིང་མཚམས་སྦྱར།
།རྣམ་ཤེས་ཞེན་ཡུལ་ལྔ་ལ་ཆགས།
།ཞེན་པ་སྒྱུ་མ་གཟུགས་བརྙན་བདུད།
།འདུས་བྱས་འཇིག་པའི་འཆི་བདག་བདུད།
།རྣམ་རྟོག་ལྷ་ཡི་བུ་ཡི་བདུད།
།ང་བདག་འཛིན་པ་བདུད་ཡིན་ནོ།
།དེ་ནས་གཤེན་ཟ་ནེའུ་ཆུང་མས།
།གཤེན་རབ་ཡབ་ལ་ཡང་ཞུས་པ།
།ཡབ་གཅིག་གཤེན་རབ་མི་བོ་ལགས།
།གཤེན་རབ་བདེན་པར་སྤྱོད་པ་ལས།
།མི་བདེན་བདུད་ཀྱིས་བསླུ་བའི་བདུད།
།ཆོ་འཕྲུལ་སྟོན་[96]ཚུལ་ཇི་ལྟར་ལགས།
།གཤེན་རབ་ཡབ་ཀྱིས་བཀའ་བསྩལ་བ།
།ཉོན་ཅིག་གཤེན་ཟ་ནེའུ་ཆུང་ལ།
།སྣང་བ་དང་ནི་མུན་པ་བཞིན།
།འབྲེལ་མེད་སོ་སོར་སྣང་གྱུར་ཀྱང་།
།འབྲེལ་བཅས་བདུད་ནི་སེམས་ལས་བྱུང་།
།སེམས་ལ་དགེ་སྡིག་གཉིས་མི་སེམས།
།དགེ་བ་ཐར་པར་བླ་མེད་ལམ།
།མི་དགེ་སྡིག་ཏོ་བདུད་ཀྱི་ལས།
།རང་གི་རྣམ་རྟོག་ལས་ལས་བྱུང་།
།རྣམ་རྟོག་ཆོམ་ན་བདུད་དང་བྲལ།
།དེ་ལས་རྣམ་པར་རྟོག་བྲལ་བྱ།
།དེ་ལ་བདུད་རྗེ་ཁྱབ་པ་ཡིས།
།བདག་གྲོང་ཁྱེར་ལང་ལིང་སྐུ་འཆག་ཚེ།
།རི་དང་ཆུ་དང་མེ་འོབས་སྤྲུལ།
།བདག་བཟོད་པ་བསྒོམ་པས་རི་དང་ཆུ།
།མེ་འོབས་པད་མའི་ཚལ་དུ་གྱུར།
།གཤེན་རབ་ཡབ་ལ་བོན་ཉན་དུས།
།ཁྱབ་པས་ཡབ་ཀྱི་ཚུལ་བསྟན་ནས།
།སྲས་ནི་གཤེན་རབ་མི་བོ་ཁྱོད།
།ཡབ་ཀྱི་བཀའ་ངག་ཚིག་གསུམ་ཉོན།
།རྒྱལ་བུ་རྒྱལ་སྲིད་སྐྱོང་བ་ལ།
།རྒྱལ་སྲིད་བོན་དུ་མ་སྒྱུར་ཅིག
[97]།བོན་ནི་བསླུ་བྱེད་རྫུན་ཀྱི་ཚིག
།ཡབ་མྱེས་གོང་མས་འདི་མ་བྱས།
།འདི་མ་བྱས་ལ་རྒྱལ་སྲིད་སྐྱོངས།
།ཞེས་ཟེར་[38]སྟོན་པས་ལན་སྨྲས་པ།
།བདུད་རྗེ་ཁྱབ་པ་ཚུར་ཉོན་དང་།
།ང་ནི་ཐབས་དང་ཤེས་རབ་ལས།
།སྐྱེས་པ་ང་ལ་ཡབ་གཞན་མེད།
།གཡུང་དྲུང་འགྱུར་མེད་བོན་ལ་ནི།
།རྫུན་ཞེས་ཟེར་མི་ཁྱོད་བས་མེད།
།ཁྱོད་རང་ལ་རང་རྫུན་མ་འདེབས་ཤིག
།ཅེས་བྱས་བདུད་རྗེ་ལྡོག་ནས་སོང་།
།གཤེན་རབ་ཡུམ་ལ་མེ་ཏོག་འཐོར།
།ཁྱབ་པ་ཡུམ་དུ་སྤྲུལ་ནས་བྱུང་།
།སྲས་གཅིག་གཤེན་རབ་ལྷ་ཡི་བུ།
།ཡུམ་ལ་བདེན་ཚིག་ཅི་ཡོད་ཉོན།
།ཡབ་རྒྱལ་པོན་འཁྲུལ་པའི་བོན་ཡང་ཟིན།
།ཡབ་རྒྱལ་པོན་འཁྲུལ་པའི་བོན་འདི་སྤོངས།
།ཁྲ་ཐོག་ཁྱི་ཁྱེར་རི་དྭགས་གཤོར།
།གཞོན་ནུ་ཀུན་གྱི་ལས་སུ་ཡིན།
།ཞེས་མི་དགེ་སྡིག་ལ་བསྐུལ་མ་བཏབ།
།དེ་ལ་གཤེན་རབ་[98]ལན་བཏབ་པ།
།བདུད་ཕྲུག་ཤོར་བ་གཞོན་ནུ་ཉོན།
།ངས་འཁྲུལ་པའི་བོན་འདི་གདོད་ནས་སྤངས།
།མ་འཁྲུལ་བདེན་པའི་བོན་ལ་སྤྱོད།
།གཡུང་དྲུང་མི་འགྱུར་རྒྱལ་སྲིད་སྐྱོང་།
།ཁྲ་ཐོག་ཁྱི་འགྱེད་བདུད་ཀྱི་ལས།
།ངན་སོང་འཁོར་བའི་གཞེན་འདེབས་ཡིན།
།ཁྱོད་བདུད་ཕྲུག་རང་བདུད་རང་ལ་འབབ།
།གཤེན་རབ་བདེན་པའི་དོན་སྤྱད་པས།
།དགེ་ལྡན་སེམས་ལ་སྡིག་མི་འགོས།
།ཞེས་གསུངས་བདུད་ཕྲུག་སྐྱེངས་ནས་སོང་།
།གཤེན་རབ་སྒོ་བཞི་མཛོད་འཆད་དུས།
།ཁྱབ་པ་གསས་ཆེན་རུ་བཞིར་སྤྲུལ།
།ཀྱེ་མ་སྟོན་པ་གཤེན་རབ་ཉིད།
།ངེད་གསས་ཆེན་རུ་བཞི་བྱ་བ་ཡིན།
།ཉི་མ་ཕྱོགས་བཞིའི་དཔོན་གསས་ལགས།
།གཤེན་རབ་མི་བོ་འདི་ལྟར་གྱི།
།བོན་ནི་འདོད་པ་དགུ་འགྱུར་ལགས།
།གོ་མཚོན་དམག་གི་དཔུང་ཆས་ལ།
།ཉི་མ་ཕྱོགས་བཞིར་རྒྱལ་སྡེ་ཐུལ།
།གླིང་བཞིའི་[99]ནོར་ལ་རྒྱལ་ནོར་གྱིས།
།ཞེས་སྨྲས་གཤེན་རབ་ལན་བཏབ་པ།
།ཀྱེ་མ་ཁྱབ་པ་ལག་རིང་པོ།
།གསས་བཞི་མ་ཡིན་འཇིག་རྟེན་སྐྱོངས།
།འཁོར་བ་ཟོ་ཆུའི་རྒྱུན་ལྟར་འཁོར།
།གཤེན་རབ་ཕ་དང་མ་རུ་མགྱུར་མེད།
།དྲིན་ཆེན་མ་ལ་སྡང་བ་དེ།
།བདུད་མིན་གཞན་ལ་ག་ལ་ཡོད།
།ང་ཞེ་སྡང་སྤངས་པས་དམག་དཔོན་མིན།
།འདོད་ཆགས་སྤངས་པས་ནོར་མི་ལེན།
།ང་རྒྱལ་སྤངས་པས་སྡེ་མི་འཇོམས།
།རྒྱལ་ས་སྡེ་བཞི་རང་གི་སྡེ།
།ཁྱབ་པ་རྨོངས་པའི་བསླུ་ཚིག་ཟ།
།ཞེས་གསུངས་སྲས་བཞི་མངའ་འོག་ཚུད།
།གཤེན་རབ་ཕྱྭའི་སྐུ་འཚོ་ཚེ༑
༑ཁྱབ་པ་ལྷའི་བུ་འདྲ་སྤྲུལ།
།བཙུན་མོ་རྣམས་ལ་བསླུ་ཚིག་སྨྲས།
།གཤེན་རབ་ཕྱྭ་ཡི་སྐུ་འཚོ་ཚེ༑
༑ང་ཕྱྭའི་བུ་མོ་བཙུན་མོར་བླངས།
།དེ་གཏོ་སྒྲོ་དཔྱད་སྒྲོ་ཞུགས་ལ་[100]སྲེགས།
།དུ་བ་ཕྱྭ་ཡི་ཡུལ་དུ་འགྲོ།
།གཤེན་རབ་མི་བོ་འདིར་དགོངས་ངེས།
།ཞེས་པས་དཔོ་ཟ་ཐང་མོ་བསླུས་གྱུར་ནས།
།གཏོ་སྒྲོ་དཔྱད་སྒྲོ་ཞུགས་ལ་བསྲེགས།
།གཏོ་བུ་དཔྱད་བུས་སྤར་དོ་ཟིན།
།ཡི་གེ་དཔའ་བོ་འབྲུ་ལྔ་[39]དང་།
།གཏོ་བུས་བྱང་བུ་སུམ་བརྒྱ་དང་།
།དཔྱད་བུས་བྱང་བུ་དགུ་བཀྲ་ཟིན།
།གཏོ་དཔྱད་འབུམ་སྡེ་ཞུགས་ལ་སོང་།
།དཔོ་ཟ་ཐང་མོ་ཁྱབ་པས་བསླུས།
།བུ་ནི་བདུད་བུ་གོ་བོ་ཆུང་།
།ཡུལ་ནི་བྲ་མ་ཁྲི་འོད་དང་།
།སེམས་ཅན་བསོད་ནམས་སོགས་པ་བྱུང་།
།མོ་མ་སྡིག་ང་སྡིག་ལོམ་སྨྲས།
།བསླུ་བའི་བོན་གྱིས་བསླུ་བྱས་སྟེ།
།སྔ་དྲོ་གཤེན་ལ་མེ་ཏོག་འཐོར།
།ཕྱི་དྲོ་ཡང་བསྒབ་སྤུ་དྲི་བརྒྱད།
།བསླུ་བའི་བདུད་བུ་གོ་ཆུང་གུམ།
།དཔོ་ཟ་དེ་ལ་མྱ་ངན་སྨྲེ།
།དེ་ལ་གཤེན་རབ་ཀྱིས་སྨྲས་པ།
།དཔོ་ཟ་ཐང་མོ་མ་སྨྲེ་ཞིག
།བུ་འདི་བདུད་ཀྱིས་བསླུ་[101]བའི་བུ།
།ལ་ལ་སྲིན་གྱིས་དམོད་པའི་བུ།
།ལ་ལ་བགེགས་ཀྱིས་བར་ཆོད་བུ།
།ལ་ལ་ལན་ཆགས་སྙེག་པའི་བུ།
།ལྷ་ཡི་ཐུགས་རྗེའི་བུ་དཀའོ།
།ཞེས་གསུངས་དཔོ་ཟས་དྲན་པ་རྙེད།
།གཤེན་ཟ་ནེའུ་ཆུང་ཁྱབ་པས་བསླུས།
།བདུད་ཕྲུག་སྟག་བུ་ཐུང་དང་གཟིག་བུ་ཐུང་།
།ཤ་ལ་རྔམ་ཞིང་ཁྲག་ལ་འཐུང་།
།ནེའུ་ཆུང་དེ་ལ་བློ་འགྱུར་ནས།
།ནུ་མ་བཅད་ནས་གཟན་དུ་སྒྱུར།
།མོ་གླིང་ཁོ་མ་ནེའུ་ཆུང་སླེབ།
།ལུང་འདྲེན་རྒྱུད་འདྲེན་དྲལ་དང་མཇལ།
།སྲས་ཡུམ་གཤེན་རབ་དགའ་སྤྲོ་སྐྱེས།
།དེ་ནས་ཁྱབ་པ་ལག་རིང་གིས།
།གཤེན་རབ་དཀོར་ལ་ཆོ་འཕྲུལ་བསྟན།
།བདུད་ཕྲུག་ཤོར་བ་རྐྱ་བདུན་གྱིས།
།གཤེན་རབ་རྟ་བདུན་ཁྱེར་ནས་སོང་།
།རྐོང་པོ་ཡུལ་དུ་རྟ་རྗེས་བསྟན།
།ཁ་བ་སུབ་མས་རྟ་རྗེས་བཅད།
།ཉི་མ་དགུ་ཤར་ཁ་བ་བཞུས།
[102]།བདུད་རི་ནག་པོ་བོན་རིར་བསྒྱུར།
།ལ་དོར་བྲག་འཕྲང་རྟ་ལམ་གཏོད།
།ལྕགས་ཕུབ་དགུ་ཕུག་བྲག་རི་ཕུག
།མདའ་དྲངས་ཆུ་མིག་དཀར་པོ་དྲངས།
།རྐོང་རྗེ་དཀར་པོའི་མཁར་སྒོར་སླེབས།
།བྲག་འཕྲང་ཆུ་མདོར་མདའ་ལམ་བཏོད།
།རྟ་བརྐུས་ལས་ལན་རྐོང་རྗེ་ཡིས།
།རྐོང་ཟ་ཁྲི་ལྕམ་གཤེན་ལ་ཕུལ།
།ཤུལ་ལམ་ཡར་ཆབ་གཙང་བོར་བྱུང་།
།ལྷ་རི་གྱང་དོར་ཞག་བདུན་བཞུགས།
།ཤུལ་དཀར་གཙང་བྱ་གཡུང་དྲུང་ཁར།
།སྟོན་པའི་ཞབས་རྗེས་བཏོད།
།ཁྱུང་ལུང་རྔུལ་མཁར་བརྩིགས།
།གཤེན་བུ་རྐོང་ཚ་དེ་རུ་འཁྲུངས།
།དེ་ནས་མ་པང་མཚོ་ལ་འཆག
།ཀླུ་ཡི་སྟོན་པ་ལོ་གཅིག་མཛད།
།ཏི་ཙེ་གངས་ཀྱི་རྩེ་མོ་རུ།
།མ་སངས་ལྷ་ཡི་ཞལ་དྲོ་དྲངས།
།དེ་ནས་སླར་ཡང་འོལ་མོ་གླིང་།
།ཁྲི་སྨོན་རྒྱལ་བཞད་དག་ཏུ་བྱོན།
།སྟོན་པས་ཁྱིམ་སྤངས་རབ་ཏུ་བྱུང་།
།དེ་ཚེ་ཁྱབ་པས་འདི་[103]སྐད་དུ།
།གཤེན་རབ་མི་བོ་འཁྲུལ་ཏེ་སོང་།
།རྒྱལ་སྲིད་ནོར་དང་ཆུང་མ་དང་།
།བུ་དང་བུ་མོ་འཁོར་སྤངས་ཏེ།
།གཅིག་པུར་འཁྱམ་པ་རེ་དགའ་སྙམ།
།འོན་ཀྱང་དེ་རུ་སུན་དབྱུང་ཕྱིར།
།བདུད་ཀྱི་བུ་མོ་དྲུག་པོ་ནི།
།མཛེས་པའི་རྒྱན་ཆ་མང་པོས་བརྒྱན།
།སྟོན་པའི་མདུན་དུ་[40]འོངས་ནས་ནི།
།གླུ་ལེན་གར་བྱེད་བཞིན་མཛེས་བསྟན།
།ངེད་དྲུག་ལྷ་ཡི་བུ་མོ་དགའ་མཛེས་མ།
།མེ་ཏོག་ཁ་ཕྱེ་པད་མ་མཛེས་པ་ལ།
།ཆགས་ཤིང་སྤྱད་ན་དགའ་སྐྱིད་ཕུན་སུམ་ཚོགས།
།གཏན་གྱི་གྲོགས་སུ་བགྱིས་ཀྱང་ཉེས་པ་མེད།
།ཚུལ་ཁྲིམས་གཙང་མའི་གོས་འདི་ད་སྤོངས་ལ།
།ན་བཟའ་མཛེས་དགུ་སྐུ་ལ་གསོལ་ཡང་མཛོད།
།བྱང་ཆུབ་སྤྱོད་པའི་བློ་ནི་ཡང་སྒྱུར་ལ།
།དགྱེས་ཤིང་རོལ་པ་མཛོད་ཅིག་སྐྱེས་བུ་མཆོག
།ཅེས་སྨྲས་སྟོན་པས་ལན་གསུངས་པ།
།ལྷའི་བུ་མོ་གཞན་གྱིས་པད་[104]མ་དེ།
།ངན་སྐྱུག་མི་གཙང་སྣོད་དེ་ང་མི་ཆགས།
།མ་རྒན་བརྒྱད་ཅུ་ལོན་པའི་རྒན་མོ་རྣམས།
།འདོད་པའི་འདོད་ཆགས་ངན་པ་སྤྱད་ཅིང་འདོད།
།དེའི་གཉེན་པོར་མི་སྡུག་བསམ་གཏན་བཟང་།
།རྔོ་ཅན་ནད་ནི་ཕྲུག་ཅིང་ཕྱིར་ཕྱིར་ཟ།
།མ་ཕྲུག་བཞག་ན་དེ་ལ་ཟ་བ་མེད།
།ལན་ཚའི་ཆུ་འཐུང་འཐུང་ཞིང་ཕྱིར་ཕྱིར་སྐོམ།
།འདོད་པའི་ཡོན་ཏན་དེ་ལ་ང་མི་ཆགས།
།ཆོ་འཕྲུལ་བསླུ་བ་སེམས་སུ་ངོ་ཤེས་ཆགས་པ་མེད།
།ཅེས་གསུངས་སེ་གོལ་བརྡབས་ཙམ་གྱིས།
།བུ་མོ་དྲུག་ནི་མི་སྡིག་རྒན་མོ་དྲུག་ཏུ་སོང་།
།དེ་ནས་རྒན་མོ་དྲུག་གིས་སྟོན་པ་ལ་བསྟོད་པ།
།ཨེ་མ་ངོ་མཚར་སྟོན་པ་རབ་ཏུ་བྱུང་།
།རྒྱལ་སྲིད་ཁྱིམ་ལ་ཆགས་པ་མེད།
།ཁྱེད་ནི་ཆགས་མེད་སྒྱུ་མ་ལྟ་བུར་གཟིགས།
།ཆུའི་པད་མ་ལྟ་བུ་གནས་པ་ལ།
།བསླུ་བའི་ཚུལ་གྱིས་ངོ་ཚ་ཁྲེལ་བརྗོད་པས།
།བཀའ་ཆད་འཕྲལ་ལ་བྱུང་སྟེ༑
༑རྒས་ཤིང་འཁོགས་པར་གྱུར།
།སྟོན་མཆོག་སྐུ་ལ་བཟོད་གསོལ་གནོང་ཞིང་བཤགས།
།སྟོན་མཆོག་[105]ཐུགས་ནི་ནམ་མཁའ་ལྟ་བུ་སྟེ།
།ཆུའི་པད་མ་བཞིན་དུ་དྲི་མེད་དག
།གཤེན་རབ་མི་བོ་མཚན་དང་དཔེ་བྱད་འབར།
།ཡོན་ཏན་མཆོག་ལྡན་ཁྱོད་ལ་ཕྱག་འཚལ་བསྟོད།
།བདག་ལ་ཐུགས་རྗེས་བཟུང་ནས་སྡུག་བསྔལ་སྐྱབས་པར་ཞུ།
།ཞེས་ཞུས་བུ་མོ་དྲུག་གྱུར་མེ་ཏོག་མངོན་པར་གཏོར།
།བདུད་ཀྱི་བུ་མོ་དྲུག་རབ་བྱུང་སྟེ།
།མོ་གླིང་ཁོ་མ་ནེའུ་ཆུང་གནས་སུ་བཀོད།
།ཤོར་བ་རྐྱ་བདུན་རབ་བྱུང་ཕོ་གླིང་བཀོད།
།དེར་ཁྱབ་པ་སྡུག་བསྔལ་ཁང་བར་ཞུགས།
།རྒྱལ་པོན་ཐོད་དཀར་བུ་གཅིག་གཤེན་རབ་འདི།
།ཅིས་ཀྱང་མ་ཐུབ་བདུད་འཁོར་ཟད་ལ་ཐུག
།ད་ནི་མྱེས་ལ་བཟློག་ལ་བདུད་དམག་བསྡུས་སྙམ་དྲན།
།ཁྱབ་པ་དགའ་རབ་དབང་ཕྱུག་དྲུང་དུ་ཕྱིན་ནས།
།མྱེས་གཅིག་དགའ་རབ་དབང་ཕྱུག་གསོན།
།རྒྱལ་པོན་ཐོད་དཀར་བུ་གཅིག་གཤེན་རབ་འདི།
།ཅིས་ཀྱང་མ་ཐུབ་བདུད་འཁོར་ཟད་ལ་ཐུག
།གཤེན་རབ་[106]མངོན་པར་རྫོགས་སངས་རྒྱས་ནས།
།འོ་སྐོལ་བདུད་ཀྱི་འཇིག་རྟེན་སྟོང་པར་ངེས།
།འདི་ལ་ད་རེས་གནག་ཕྱིར་བདུད་ཀྱི་དམག་དྲང་[41]དགོས།
།ཞེས་པས་དགའ་རབ་དབང་ཕྱུག་གིས།
།ཁྱབ་པར་གཤེན་རབ་བདེན་པའི་ཐུགས་དཀའ་སྟེ༑
༑དཀའ་ཡང་ལྷ་ཡི་བུ་ཡི་བདུད།
།དམག་ནི་བྱེ་བ་ས་ཡ་བསྡུས།
།བདུད་ཀྱི་འཁྲུལ་འཁོར་སྒྱོགས་ཆེན་ཆས།
།ཞེས་ཟེར་ཁྱབ་པས་ལུང་ཐོབ་ནས།
།བདུད་དམག་བྱེ་བ་ས་ཡ་བསྡུས།
།མཚོན་ཆ་མདའ་མདུང་རལ་གྲི་དང་།
།འཁོར་ལོ་སྒྱོགས་ཆེན་གཟུ་བ་བཅས།
།བར་པོ་སོ་བརྒྱད་མཁར་ལ་དྲངས།
།དེ་ཚེ་སྟོན་པ་གཤེན་རབ་ཉིད།
།བྱམས་པ་ལྷའི་ཏིང་ངེ་འཛིན།
།སྟོང་ཉིད་མི་གཡོ་ཏིང་འཛིན་སྒོམ།
།བདུད་ཀྱིས་མདའ་འཕང་མེ་ཏོག་གྱུར།
།རྡོ་རྣམས་རིན་ཆེན་ཆར་དུ་བབས།
།སྒྱོགས་ནི་འོད་ཀྱི་འཁོར་ལོར་གྱུར།
།མཚོན་ཆ་ལྷའི་རོལ་མོ་གྱུར།
།བདུད་སེམས་བྱམས་པའི་ངང་དུ་བསྒྱུར།
།དེ་ཚེ་ཟ་བྱེད་བདུད་བཞི་ཡི།
།སེང་[107]གེ་གླང་ཆེན་ཆུ་སྲིན་འབྲུག་གི་མགོ
།ཞལ་གདངས་བར་པོ་སོ་བརྒྱད་ཕྱོགས་བཞིར་བསྐོར།
།ཀླུ་འབྲུག་སྟོང་ལྡིར་བདུད་དམག་ཀིས་བཏབ་སྟེ༑
༑དེ་ཚེ་ཁྲོ་ཆེན་རུ་བཞིས་བར་བོ་སོ་བརྒྱད་རྩེ་མོ་ནས།
།སྟོན་པ་བདུད་ལས་རྒྱལ་ཞེས་བསྭོ་སྒྲ་བཏབ།
།ཨ་པར་ཐུམ་མུ་པར་ཞི་ཀྲེ་ལ་གེ་གོད་སྤུང་དྲི་པར་མྱུལ་མྱུལ།
།ཞེས་བརྗོད་བདུད་རྣམས་སྤ་བསྐོང་བརྒྱལ།
།བརྒྱལ་སངས་བདུད་དམག་བྱེ་བ་གྱེས།
།དེ་ནས་སྟོན་པ་གཤེན་རབ་ཀྱིས།
།དུག་ལྔ་འདུལ་བའི་སྙིང་པོ་བརྗོད།
།ཨ་དུན་འདུ་མུ་རུམ་སྤྲོས་ཁ་ཏིལ་ཞི།
།ཞེས་གསུངས་བདུད་ཀྱི་དུག་ལྔ་ཞི།
།རྒྱ་ལག་ཐོད་རྗེ་འབངས་སུ་བྱུང་།
།རབ་ཏུ་བྱུང་སྟེ་ཕོ་གླིང་བཀོད།
།ཁྱབ་པ་གཅིག་པུ་མྱ་ངན་ཁང་པར་སོང་།
།གཞན་ཡང་སྟོན་པ་གཤེན་རབ་ལ།
།མ་བརྟག་པ་ཡི་དགྲ་བཞི་བྱུང་།
།ཕ་སྤུན་མ་བརྟག་གཉའ་ནོན་དགྲ།
།བདུད་རྗེ་ཁྱབ་པ་གཉའ་[108]ནོན་དགྲ།
།གཤེན་རབ་ཆུས་དང་སྲིད་ལ་རྒོལ།
།དེར་སྟོན་པས་བཀའི་བྱ་ར་མངགས།
།སྲིད་པའི་རྒྱལ་མོ་ཐུགས་འཁྲོས་པས།
།བདུད་རྗེ་ཁྱབ་པ་ནག་པོ་བསྒྲལ།
།བསྟན་སྲུང་སྲིད་པ་རྒྱལ་མོ་བྱས།
།བསྟན་པ་བོན་གྱི་སྒོ་བཞི་བསྲུངས།
།ཆུང་མ་མ་བརྟགས་སྲིད་ཀྱི་དགྲ།
།རྐོང་ལྕམ་དཀར་མོ་སྲིད་ཀྱི་དགྲ།
།རྒྱ་ཡི་གེ་མོའི་ཟླ་ལ་སོང་།
།སྟོན་པས་ཕོ་ཉ་དམུ་བཙན་མངགས།
།རྒྱ་རྗེ་རང་བདུད་ཕབ་དེ་བསྒྲལ།
།སློབ་བུ་མ་བརྟགས་བཅུད་ཀྱི་དགྲ།
།གཉན་ཐེའུ་ནག་པོ་བཅུད་ཀྱི་དགྲ།
།སྟོན་པའི་རྩིས་སྒྲོ་སྨན་སྒྲོ་བརྐུས།
།ས་འོག་དགུ་ཡི་ཞབས་སུ་ཁྱེར།
།སྟོན་པས་སྒྲ་བླའི་རྒྱལ་མོ་མངགས།
།སྒྲ་བླའི་རྒྱལ་མོ་འཁྲོས་པ་ཡིས།
།གཉན་ཐེའུ་ནག་པོ་བསྒྲལ་བར་བྱས།
།ཡིད་ཀྱི་ཁྱེའུ་ཆུང་སྤྲུལ་པ་ཡིས།
།ས་འོག་དགུ་ནས་རྩིས་སྒྲོ་སྨན་སྒྲོ་ལོན།
།གྲོགས་པོ་མ་བརྟགས་ལམ་གྱི་དགྲ།
[109]།ཧོར་ཕྲུག་ཤོར་བ་རྟ་བདུན་[42]གྱིས།
།སྟོན་པའི་རྟ་བདུན་ཁྱེར་ནས་སོང་།
།ཕོ་ཉར་གས་བཙན་རྒྱལ་པོ་མངགས།
།ནེ་ཝེར་རྒྱལ་པོ་ཐུགས་འཁྲོས་པས།
།ཧོར་གྱི་ཡ་བ་རྐྱ་བདུན་བསྒྲལ།
།དེ་ནི་བསྟན་པའི་བཀའ་སྲུང་བཞི།
།གཡུང་དྲུང་བོན་སྒོ་བཞི་བསྲུང་ངོ་།
།གཡུང་དྲུང་ལྷའི་བོན་མདོ་འདུས་པ་རིན་པོ་ཆེའི་རྒྱུད་ལས།
སྟོན་པ་ལ་བདུད་ཀྱི་ཆོ་འཕྲུལ་བསྟན་པ་བཏུལ་པའི་ལེའུ་སྟེ་བཅུ་གཉིས་པའོ།།
གངས་ཏི་སེ་བོན་གཞུང་རིག་མཛོད་ལྟར་སྐྲུན་པ།
ཤོག་གྲངས་ནི།
Bon
Foundation བོན་བཀའ་འགྱུར་ལ་པོད་སུམ་བཅུ་པ་ནས།
ཨང་ཀི་དམར་པོ།
(Si
khron zhing chen par khrun lte gnas par 'debs khang, Chengdu 1999)
གངས་ཏི་སེ་བོན་གཞུང་རིག་མཛོད་ལ་དེབ་དང་པོ་ནས།
ཨང་ཀི་སྔོན་པོ།
(Gangs
ti se bon gzhung rig mdzod, Amdo 2009)
Brak komentarzy:
Prześlij komentarz