(23) མདོ་འདུས་ལས། ལེའུ་ཉེར་གསུམ་པ། ཁྱབ་པ་རབ་ཏུ་བྱུང་སྟེ་སྟོན་པའི་བསྟན་པ་རྗེས་སུ་བསླབ་པར་བསྟན་པ།

།།དེ་ནས་སྟོན་པ་གཤེན་རབ་ལ། །བདུད་རྗེ་ཁྱབ་པས་ཞུས་པའི་མདོ། །ཨེ་མ་སྟོན་པ་[79]གཤེན་རབ་མཆོག །སྟོན་པས་ཅི་ཡང་མ་བྱས་པར། །ང་ཡིས་མ་བྱས་དགུ་བྱས་ལ། །སྟོན་པའི་བ་སྤུ་བསྐྱོད་མ་ནུས། །ཅི་ཡང་མ་བྱས་བདེན་པར་སོང་། །མ་བྱས་དགུ་བྱས་རྫུ་འཕྲུལ་ཟད། །ཁྱབ་པ་བདག་ལ་[213]བོན་ཅིག་ཤོད། །ཅེས་སྨྲས་སྟོན་པས་བཀའ་བསྩལ་བ། །བདུད་རྗེ་ཁྱབ་པ་ཅུང་ཟད་ཚུར་ཉོན་དང་། །ང་དང་ཁྱོད་ནི་དང་པོ་ནི། །དམྱལ་བར་སོག་ལེ་དྲང་དུས་སུ། །ང་བཅད་གཏུབ་ལས་ལ་སྙིང་རྗེ་སྐྱེས། །ཡི་དྭགས་བཀྲེས་སྐོམ་གདུངས་དུས་སུ། །བཟའ་བཏུང་རྙེད་ཚད་རོགས་ལ་བྱིན། །བྱོལ་སོང་བྱ་ཁྱུར་སྐྱེས་ཙམ་ན། །བྱའི་དགེ་བསྙེན་བདག་གིས་བྱས། །བདག་གནས་གཙང་ལྷ་བུ་གསལ་བར་སྐྱེས། །དེ་ཚེ་འབུམ་ཁྲི་གློག་སྒྲོན་ལ། །སྟོན་པར་འབྱུང་བར་སེམས་བསྐྱེད་ཐོབ། ཁྱེད་ནི་བདུད་རྗེ་དགའ་རབ་དྲུང་། །བདུད་ཕྲུག་རྟུལ་ཤུགས་ཅན་གྱུར་ཚེ། །བདག་ལ་འགྲན་ཏེ་དམོད་པ་བོར། །དེ་དུས་བདག་གིས་བཟོད་པ་ཐོབ། །བདག་ནི་མི་ཡུལ་བྲམ་ཟེ་སྣང་བྱེད་གྱུར། །རང་བྱུང་ཐུགས་རྗེའི་སྟོན་པ་ལ། །མེ་ཏོག་གཏོར་ཏེ་སེམས་བསྐྱེད་ཐོབ། །ཁྱོད་བྲམ་ཟེ་རྐུ་དུག་ཅན་དུ་གྱུར། །ང་ལ་རྐུ་དུག་ཁྱོད་[214]ཀྱིས་བཏང་། །ངས་བྱམས་སེམས་བསྐྱེད་དེ་བཟོད་པ་ཐོབ། །བདག་རྒྱལ་བུ་དགེ་རྒྱས་གྱུར་དུས་སུ། །སྟོན་པ་འཁོར་བ་ཀུན་འདྲེན་པ། །བདུད་རྩིའི་ས་ཞག་དྲངས་པར་གྱུར། །ཁྱོད་ནི་རྨད་བྱུང་ཤེས་པར་གྱུར། །བདག་ལ་མཚོན་ཆས་བརྡེག་པ་ལ། །མཚོན་ཆས་མ་ཟུག་ཞིག་པར་གྱུར། །བདག་ཚོགས་དཔོན་བུ་རུ་སྐྱེས་ཙམ་ན། །རང་ཕམ་རོགས་ལ་དྲང་རྒྱལ་བགྱིས། །ཁྱོད་རྒྱུད་གཏུམ་པར་གྱུར་པ་ཡིས། །ང་ནི་མི་ནོར་རྣམས་རྐུ་འཕྲོག་ཟེར། །རྒྱལ་པོས་ཁྱོད་ལ་ཆད་པ་བཅད། །བདག་བྲམ་ཟེ་དཀོར་ཕྱུག་བུར་སྐྱེས་ཚེ། །སྟོན་པ་ཚད་མེད་ཐུགས་རྗེ་ལ། །མུ་ལེ་དྲུམ་ཤིང་གཙུག་ཕུད་ཚེ། །ཁྱོད་རྟུལ་ཤུགས་ཅན་དུ་སྐྱེས་ཙམ་ན། །བདག་གི་དཀོར་ལ་བརླམས་དུས་སུ། །ཡུལ་མིས་ཁྱོད་ལ་ཁྲིམས་ཀྱང་བཅད། །བདག་རྗེའུ་རིགས་བློ་གྲོས་གྱུར་དུས་སུ༑ ༑སྟོན་པ་ཐམས་ཅད་མཁྱེན་གཟིགས་ལ། །ལོངས་སྤྱོད་[215]འབྲས་བུའི་ཕུང་པོ་ཕུལ། །བདག་གཤེན་རབ་མི་བོར་ལུང་བསྟན་དུས། །ཁྱོད་རྨངས་རིགས་ཤན་དམར་ཅན་དུ་གྱུར། །འབྲས་བུའི་ཕུང་པོ་གཏོར་བ་ལ། །གཏོར་བ་ཙམ་གྱིས་མང་དུ་འཕེལ། །ཁྱོད་དེ་ལ་ཕྲག་དོག་སྐྱེས་གྱུར་ཏེ། །ང་སྟོན་པ་གཤེན་རབ་གྱུར་དུས་སུ། །ཁྱོད་བདུད་རྗེ་ཀུན་ཁྱབ་གཅིག་གྱུར་ལ། །ཁྱེད་ལ་འགྲན་དང་དོར་བསྡོས་ཤོག །ཁོས་དམོད་པ་བོར་ཏེ་ང་ལ་ནི། །ཕྲག་དོག་མེད་པར་བཟོད་པ་ཐོབ། །བདག་གཏོ་བུ་བློ་གསལ་གྱུར་པའི་ཚེ། །སྟོན་པ་གཏོ་རྒྱལ་ཡེ་མཁྱེན་ལས། །རིན་པོ་ཆེའི་གཏེར་[80]མཛོད་ཕུལ། །སྟོན་པ་དཔེའུ་ཙེ་རྣམ་གསུམ་བཞག །ཁྱོད་བདུད་ཕྲུག་རྙོབ་པ་ལག་རིངས་གྱུར། །ང་ལ་བར་ཆོད་སྣ་དགུ་བྱས། །བདག་ནི་བྱམས་ཆེན་བཟོད་པ་བསྒོམས། ཁྱོད་གདུལ་བྱར་གཟུད་པར་སེམས་བསྐྱེད་དོ། །བདག་ནི་གཤེན་རབ་མི་བོ་འཁྲུངས་དུས་སུ། །ཁྱོད་[216]ཨུ་དུམ་ཝ་རའི་རྩ་བ་བཅད། །བཅད་པ་ཙམ་གྱིས་ལོ་འདབ་རྒྱས། །འཛམ་བུ་ཤིང་ནི་སྐྱེས་དུས་སུ། །རྩ་བ་བཅད་དེ་ལོ་འདབ་རྒྱས། །བདག་དང་པོ་ལྷུམས་སུ་ཞུགས་དུས་སུ། །ཡུལ་ལ་ནད་ཀྱི་མུན་པ་ཕབ། །ལྷ་ཡི་བདུད་རྩིས་ནད་སོས་གྱུར། །དེ་ནས་སྐུ་ནི་བལྟམས་དུས་སུ། །མངལ་སྒོ་སྲིན་གྱིས་ཡུལ་ལ་སྒོག་ཙམ་ནས། །བདག་མ་ཡི་མཆན་ཁུང་གཡས་ནས་བྱུང་། །ཁྱོད་མྱ་ངན་ཐང་ལ་སྒྱུར་མཆིས་ཙ། །རྒྱལ་པོས་ཕྱག་གིས་སྐུ་ཕྱིས་བླངས། །ཁྱོད་དུག་ཆུ་ནག་པོ་འཐོར་མཆིས་ཙ། །ལྷ་དང་ཀླུ་ཡིས་སྐུ་ཁྲུས་གསོལ། །བདག་ཕྱོགས་བཞིར་གོམ་པ་འདོར་དུས་སུ། །ཁྱོད་ལྕགས་ཀྱི་ཏར་ཚན་བཀོད་པ་ལ༑ ༑རྗེས་ལ་མེ་ཏོག་པད་མ་འཁྲུངས། །བདག་བྲམ་ཟེ་གསལ་བས་བལྟས་པའི་ཚེ། །ཁྱོད་མྱ་ངན་སྡིག་པའི་བུ་ཡང་བཏང་། །བདག་ཡབ་ཀྱིས་རྒྱལ་སར་ཕྱུང་ཙམ་ན། །ཁྱོད་འབངས་རྣམས་བྱེར་བར་རིགས་སོ་ཟེར། [217]།བདག་དགུང་ལོ་གསུམ་ལ་སྐུ་འཆག་དུས། །ཁྱོད་རི་དང་མེ་འབར་སྤྲུལ་པ་ལ༑ ༑མེ་འབར་པད་མའི་ཚལ་དུ་གྱུར། །བདག་ཡབ་ལ་བོན་ནི་ཉན་དུས་སུ། །ཁྱོད་ཡབ་ཀྱི་ཆས་སུ་ཞུགས་ནས་བསླུས། །ཡུམ་ལ་མེ་ཏོག་གཏོར་དུས་སུ། །ཡུམ་གྱི་ཚུལ་དུ་ཞུགས་ནས་བསླུས། །བདག་གཤེན་རབ་སློབ་དཔོན་མཛད་དུས་སུ། །སློབ་དཔོན་ཆས་སུ་ཞུགས་ནས་བསླུས། །བདག་སྒོ་བཞི་མཛོད་ལྔ་བཤད་དུས་སུ། །ཁྱོད་གསས་ཆེན་རུ་བཞིར་སྤྲུལ་ནས་བསླུས། །གཤེན་རབ་ཁབ་ནི་བཞེས་དུས་སུ། །ཁྱོད་གཤེན་རབ་བཙུན་མོར་སྤྲུལ་ནས་བསླུས། །བདག་ལ་སྲས་སུ་འཁྲུངས་པའི་ཚེ། །ཁྱོད་ལྷ་བུ་ཀླུ་བུར་སྤྲུལ་ནས་བསླུས། །བདག་ཕྱྭའི་སྟོན་པར་གཤེགས་དུས་སུ། །ཁྱོད་ཀྱིས་བཙུན་མོ་རྣམས་ཀྱང་བསླུས། །གཏོ་སྒྲོ་དཔྱད་སྒྲོ་བསྲེག་ཏུ་བཅུག །དཔོ་ཟ་ཐང་པོ་བསླུས་པ་ཡིས། །བདུད་བུ་གོ་བོ་ཆུང་ཡང་སྤྲུལ། །མོ་བོན་སྡིག་ཏོ་བདུད་ལས་བྱས། [218]།ཁྱོད་གཤེན་ཟ་ནེའུ་ཆུང་བསླུས་ནས་ཁྱེར། །བུ་སྟག་བུ་ཐུང་དང་གཟིག་བུ་ཐུང་། །ཚ་བོ་བཅས་པ་བསླུ་པར་སེམས། །ཁྱོད་དཀོར་ལ་ཆོ་འཕྲུལ་བསྟན་དུས་སུ། །ཁྱོད་རྟ་བདུན་ཁྱེར་ནས་རྐོང་པོ་ཡུལ་ལ་ཁྱེར། །བདག་རྐོང་ལྕམ་ཁབ་ཏུ་བཞེས་ཙམ་ན། །ཁྱོད་རྐོང་རྗེ་བཅས་ཏེ་བར་ཆོད་བྱས། །བདག་ཀོང་ཙེ་ལྷ་ཡི་དོན་བགྱིས་ཚེ། །ཁྱོད་ཀླུ་སྲིན་བསྟོད་ནས་དམག་ཀྱང་བྱས། །བདག་ཁྱིམ་སྤངས་རབ་ཏུ་བྱུང་ཙམ་[81]ན༑ ༑ཁྱོད་བདུད་ཀྱི་བུ་བསླུ་བར་བཏང་། །བདག་གཡུང་དྲུང་དགུ་བརྩེགས་རྩེར་བྱུང་ཚེ། །ཁྱོད་བདུད་དམག་བྱེ་བ་ས་ཡ་དྲངས། །བདག་བར་པོ་སོ་བརྒྱད་བཞུགས་པའི་ཚེ། །ཁྱོད་ཕྱོགས་བཞི་དག་ནས་དམག་ཀྱང་བཅས། །ཁྱོད་བདུད་ཀྱི་རིགས་རྣམས་སྟོང་དགོས་ཤིང་། །བདག་གཤེན་རབ་འཁོར་བ་སྤོང་ལ་དགའ། །འཁོར་རྣམས་ཐམས་ཅད་སངས་རྒྱས་འགྱུར། །གཤེན་རབ་འགྲོ་[219]བའི་དོན་ལ་དགོངས། །ང་ཡིས་འགྲོ་དོན་ཀུན་བྱས་ཀྱང་། །ཁྱབ་པ་ཁྱོད་ཀྱི་དོན་ལ་གཏད། །བདུད་སེམས་ལྷ་རུ་གྱུར་པ་ནས། །གཤེན་རབ་མྱ་ངན་ཡོངས་འདས་སོ། །ཁྱབ་པ་གཅིག་བུར་རབ་ཏུ་བྱུང་། །འཁོར་སྤངས་ད་ལྟ་དགོངས་པ་གྱིས། །འཕྲུལ་ངག་བདེན་པའི་བོན་ལ་སྤྱོད། །སྡིག་ཏོ་བདུད་ཀྱི་ལས་རྣམས་སྤོངས། །གཤེན་རབ་བཀའ་ལ་འདའ་མི་བྱེད། །བཀའ་ལ་མ་འདའ་ཐར་བར་འགྲོ། །ཁྱབ་པ་སྔར་བྱས་སྡིག་ལ་འགྱོད་ཚངས་གྱིས། །འགྱོད་པ་ཚངས་དག་ཐོབ་པ་ཡིན། །དག་པས་ཐར་ལམ་ཐོབ་པ་ཡིན། །ཞེས་གསུངས་ཁྱབ་པའི་སེམས་རྙེད་དེ། །བདུད་སེམས་ལྷ་རུ་གྱུར་ཙམ་ན། །གཤེན་རབ་མྱ་ངན་འདས་པ་ལ། །དགའ་བ་སྐྱེས་ནས་རབ་ཏུ་བྱུང་། །བཙུན་པ་རྟུལ་ཤུགས་ཅན་དུ་བཏགས། །སྟོན་པའི་བསྟན་པ་རྗེས་སུ་བསླབ། །གཡུང་དྲུང་ལྷའི་བོན་མདོ་འདུས་པ་རིན་པོ་ཆེའི་རྒྱུད་ལས། [220]།བདུད་རྗེ་ཁྱབ་པ་རབ་ཏུ་བྱུང་སྟེ་སྟོན་པའི་བསྟན་པར་རྗེས་སུ་བསླབ་པའི་ལེའུ་སྟེ་ཉི་ཤུ་རྩ་གསུམ་པའོ།།

གངས་ཏི་སེ་བོན་གཞུང་རིག་མཛོད་ལྟར་སྐྲུན་པ།

ཤོག་གྲངས་ནི།

Bon Foundation བོན་བཀའ་འགྱུར་ལ་པོད་སུམ་བཅུ་པ་ནས། ཨང་ཀི་དམར་པོ། (Si khron zhing chen par khrun lte gnas par 'debs khang, Chengdu 1999)

གངས་ཏི་སེ་བོན་གཞུང་རིག་མཛོད་ལ་དེབ་དང་པོ་ནས། ཨང་ཀི་སྔོན་པོ། (Gangs ti se bon gzhung rig mdzod, Amdo 2009)

⋘ ● ⋙