(22) མདོ་འདུས་ལས། ལེའུ་ཉེར་གཉིས་པ། ཞིང་མཆོག་འོལ་མོ་གླིང་གི་བཀོད་པ་བསྟན་པ།

[201]།།དེ་ནས་སྟོན་པ་གཤེན་རབ་ལ། །གཤེན་བུ་རྐོང་ཚས་ཞུས་པ་ནི། །ཨེ་མ་སྟོན་པ་བདེ་བར་གཤེགས། །དུས་གསུམ་བདེར་གཤེགས་འབྱུང་བའི་གནས། །གཤེན་རབ་ཞིང་ཁམས་བཀོད་པ་ནི༑ ༑ཇི་ལྟར་ལགས་པར་བཤད་དུ་གསོལ། །ཅེས་ཞུས་སྟོན་པས་བཀའ་བསྩལ་བ། །ཀྱེ་མ་མདོ་སྡུད་ལ་སོགས་འཁོར། །སྣང་མེད་ནམ་མཁའ་བོན་སྐུའི་ཞིང་། །སྟོང་གསུམ་མཐའ་མཉམ་ལོངས་སྐུའི་ཞིང་། །འཛམ་གླིང་བྱེ་བ་ཕྲག་བརྒྱ་སྤྲུལ་སྐུའི་ཞིང་། །འོག་མིན་ས་བཅུའི་འོལ་མོའི་གླིང་། [75]།སྐུ་གསུམ་ཞིང་ཁམས་བསམ་མི་ཁྱབ། །གཤེན་ཡུལ་འོལ་མོ་ལུང་རིང་ནི། །དཔག་ཚད་ལྔ་བཅུར་ཆུ་ཞེང་མཉམ། །གླིང་བཞི་རི་རབ་ཚུལ་དུ་གྲུབ། །ལྷོ་འཛམ་བུ་གླིང་གི་ནུབ་བྱང་ན། །མུ་ཁྱུད་འཛིན་གྱི་ལྷོ་ཡི་ཕྱོགས། །འཛམ་བུ་པྲིཀྵ་ཤིང་གི་རྩ། །རི་བོ་གངས་ཅན་ཏི་སེའི་དྲུང་། །མཚོ་ནི་མ་པང་གཡུ་མཚོའི་འགྲམ། །ཆུ་བོ་ཆེན་པོ་[202]བཞི་འདུས་མགོ། །རི་བོ་སྤོས་རི་ངད་ལྡན་ཉེ་བའི་ས། །རི་ནག་པོ་དགུ་འདུས་ཀྱི་ར་བ་སྟེ། །ཆུ་བོ་པཀྵུ་དང་ནི་སིནྡྷུས་བཅད་པ་སྟེ། །དུས་གསུམ་སྟོན་པ་འབྱུང་བའི་ཞིང་། །ངོ་མཚར་རྨད་དུ་བྱུང་པའི་གནས། །ས་ནི་པད་མ་འདབ་བརྒྱད་འདྲ། །བཀྲ་ཤིས་ཨུ་དུམ་ཝ་ར་སྐྱེས། །རི་ནི་གཡུང་དྲུང་དགུ་བརྩེགས་རི། །གནམ་ནི་འཁོར་ལོ་རྩིབས་བརྒྱད་འདྲ། །ཉི་མ་དྲོ་ཞིང་ཟླ་བ་གསལ། །ནམ་མཁའ་གཡུ་ཡི་ལྡིང་ཁང་གོ་འབྱེད་བྱེད། །གླིང་བཞི་གླིང་ཕྲན་ལྕགས་རི་བཅས། །དཔག་ཚད་སྟོང་དང་ལྔ་བརྒྱས་བསྐོར། །དབུས་ནི་གཡུང་དྲུང་དགུ་བརྩེགས་རི། །རིན་ཆེན་སྣ་བཞི་ལས་གྲུབ་པ། །ཆུ་ཞེང་དཔག་ཚད་ལྔ་བཅུ་ཡོད། །ཕྱི་རོལ་ཚལ་ཆེན་བཞི་ཡིས་བསྐོར། །ཤར་ན་དགའ་བའི་ཚལ། ལྷོ་ཕྱོགས་སྐྱེད་མོས་ཚལ། ནུབ་ན་པད་མའི་ཚལ། བྱང་ན་རིན་ཆེན་ཚལ། དེ་རྒྱབ་རོལ་བའི་མཚོ། དེའི་ཕྱི་རོལ་གླིང་བརྒྱད་དེ། [203]།ཤར་ན་ཤམ་པོ་ལྷ་རྩེ་ནི། །རིན་ཆེན་རྣམ་པ་བརྒྱད་བཀྲ་བ། །ལྕགས་རི་དཔག་ཚད་བདུན་གྱིས་བསྐོར། །ཕོ་གླིང་མོ་གླིང་སྟོན་པ་གཤེན་རབ་གནས། །གཅུང་རྨ་ལོ་གཡུ་ལོ་འཁྲུངས་སའོ། །ལྷོ་ན་བར་པོ་སོ་བརྒྱད་ནི། །བཻཌཱུརྻ་རིན་ཆེན་སྣ་ལྔ་བཀྲ། །ལྕགས་རི་དཔག་ཚད་བདུན་གྱིས་བསྐོར། །ཡབ་མྱེས་རྒྱལ་པོན་ཐོད་དཀར་ཁབ། །སྟོན་པ་གཤེན་རབ་སྐུ་འཁྲུངས་ས། །ནུབ་ན་ཁྲི་སྨོན་རྒྱལ་བཞད་ནི༑ ༑པད་མ་ར་ག་ཟངས་ལས་གྲུབ། །རིན་ཆེན་གཞི་བཀྲ་དཔག་ཚད་བདུན། །ཧོས་ཟ་རྒྱལ་མེད་དེ་ཡི་ཁབ། །གཏོ་བུ་དཔྱད་བུ་འཁྲུངས་པའི་ས། །བྱང་ན་ཁོ་མ་ནེའུ་ཆུང་ནི། །ཨིནྡྲ་ནཱི་ལ་གཡུ་ལས་གྲུབ། །རིན་ཆེན་གསེར་གྱི་ས་གཞི་བཀྲ། །ལྕགས་རི་དཔག་ཚད་བདུན་གྱིས་བསྐོར། །དཔོ་ཟ་ཐང་མོའི་གླིང་སྟེ། །སྲས་ནི་ལུང་འདྲེན་[204]རྒྱུད་འདྲེན་དང་། །གཤེན་ཟ་ནེའུ་ཆུང་འཁྲུངས་སའོ། །ཤར་ལྷོ་བདེ་བ་རང་གྲུབ་ནི། །དཔག་ཚད་གསུམ་པ་ཤེལ་ལས་གྲུབ། །བདེ་གཤེགས་སྟོང་གི་གསུང་དང་ནི། །ཤེལ་གྱི་ཚ་ཚ་སྟོང་བཞུགས་སོ། །ལྷོ་ནུབ་ཐུགས་རྗེ་འབྱུང་བ་ནི། །དཔག་ཚད་གསུམ་པ་ཁྲོ་ཆུ་སྟེ། །འདྲེ་སྲིན་སྟོང་ལ་རྨིང་རྡོ་བྱས། །ནུབ་བྱང་རྣམ་དག་དཀར་པོ་ནི། །དཔག་ཚད་གསུམ་པ་ཤེལ་ལས་གྲུབ། །རིན་པོ་ཆེའི་གཏེར་ཆེན་ཡོད། །བྱང་ཤར་གཤེན་རབ་སྐུ་ཚད་ནི། །རིན་ཆེན་[76]བཻཌཱུརྻ་སྔོན་པོས་གྲུབ། །དཔག་ཚད་གསུམ་པ་རང་བྱུང་གི །བུམ་པར་གཤེན་རབ་སྐུ་བཞུགས་སོ༑ ༑གསེར་ལ་བྱས་ཏེ་འོད་འབར་རོ། །དེ་རྒྱབ་རི་རབ་རི་བདུན་ཏེ། །རིན་ཆེན་ལྔ་དང་ཆུ་སྟེ་དྲུག །རྩི་ཤིང་པད་མའི་ར་བ་འོ། །དེ་རྒྱབ་གླིང་ཆེན་བཅུ་གཉིས་སྟེ། །ཤར་ན་གཡུང་དྲུང་བཀོད་པའི་གླིང་། །རིན་ཆེན་བཞི་བཀྲ་མཛེས་པ་སྟེ། །འོད་ཀྱི་ལྷ་རི་སྤོ་[205]མཐོན་ཡོད། །ཨར་མོ་ལི་ཀའི་རྡོ་ལེབ་དང་། །རིན་ཆེན་ཁྲུས་ཀྱི་རྫིང་བུ་དང་། །དཔག་བསམ་ཤིང་གི་ལོ་བཟང་དང་། འདོད་ཞོ་འབྱུང་བའི་བ་མོ་དང་། །མ་རྨོས་འབྲས་བུའི་ལོ་ཏོག་དང་། །རིན་ཆེན་གཞི་བཀྲ་སྟོན་པའི་གདན། །ཙན་དན་ཤིང་གི་སྡོང་བོ་དང་། །བཀྲ་ཤིས་རྟགས་ཀྱི་རྫས་བརྒྱད་དང་། །རྒྱལ་རྟགས་རིན་ཆེན་སྣ་བདུན་དང་། །གསལ་བ་ཧོས་ཀྱི་འོད་གུར་དང་། །འཇའ་ཚོན་རིས་ཀྱི་རྒྱབ་ཡོལ་རྣམས། །སྟོན་པའི་ལོངས་སྤྱོད་རྒྱ་ཆེན་ཡོད། །གཡས་ན་དགའ་ལྡན་ལྷ་ཡི་གླིང་། །ངོ་མཚར་བཀོད་པ་ལྡན་པ་དང་། །སྟོན་པས་ལྷ་ལ་བོན་བཤད་ས། །གཡོན་ན་འདུལ་བ་ཁྲིམས་ཀྱི་གླིང་། །རང་བྱུང་མཆོད་རྟེན་ཤིང་གིས་བརྒྱན། །སྟོན་པས་ཁྱིམ་སྤངས་རབ་བྱུང་ནས། །འདུལ་བ་རྒྱུད་དྲུག་དེར་བཤད་ས། །ལྷོ་ན་ཚད་མེད་བྱང་ཆུབ་གླིང་། །བཻཌཱུརྻ་ས་གཞི་མཛད་པ་ལས། །གསེར་གྱི་མེ་ཏོག་པད་མ་བཀྲ། །རང་རྒྱུད་ཚད་མེད་བཞི་སྦྱངས་གནས། [206]།གཡས་ན་བདུད་འདུལ་སྔགས་ཀྱི་གླིང་། །ཨ་དཀར་སྔགས་རྒྱུད་བཤད་པའི་ས། །སྟོན་པས་བདུད་ནི་བཏུལ་བའི་ས། གཡོན་ན་སྦྱིན་པ་མཐའ་རྒྱས་གླིང་། །སྟོན་པས་རིགས་དྲུག་སྦྱིན་པས་བསྡུས། །འོལ་མོ་གླིང་དུ་སྦྱིན་རྫོགས་ས། །ནུབ་ན་མི་གཡོ་བསམ་གཏན་གླིང་། །རིན་ཆེན་རིས་དྲུག་ནགས་ཚལ་བཀྲ་བ་ཡོད། །སྟོན་པས་འཁོར་སྤངས་བསམ་གཏན་མཛད་ས་འོ། །གཡས་ན་དགེ་རྒྱས་ཡོན་ཏན་གླིང་། །མཆོད་སྦྱིན་ལོངས་སྤྱོད་བྱེད་པ་ཡི། །བསོད་ནམས་དགེ་ཚོགས་བསགས་ས་འོ། །གཡོན་ན་ཚད་མེད་བྱམས་པའི་གླིང་། །བྱང་ཆུབ་སེམས་བསྐྱེད་བྱམས་པར་བསྐྱེད་ས་འོ། །བྱང་ན་གནོད་སྦྱིན་ནོར་གྱི་གླིང་། །གནོད་སྦྱིན་འཛམ་བྷ་ལ་གནས་སོ། །གཡས་ན་དྲང་མ་སྤུངས་པའི་གླིང་། །སྟོན་པ་ཁབ་ནས་བྱུང་ས་འོ། །གཡོན་ན་རིན་ཆེན་སྤུངས་པའི་རི། །ནོར་གྱི་སྦྱིན་པ་གཏོང་བ་སྟེ། །སྟོན་པའི་སྐུ་ནི་འཆགས་ས་འོ། །དེ་རྒྱབ་ཡན་ལག་བརྒྱད་ལྡན་མཚོ། །མུ་ཁྱུད་[207]མཛེས་མཚོ་ཤིང་བསིལ་གྲིབ། །དྲང་སྲོང་འགོག་པ་སྒོམ་པའི་གནས། །དེ་རྒྱབ་གླིང་ནི་བཅུ་གཉིས་སྟེ། །ཤར་རྒྱལ་རིགས་རྒྱལ་ས་འཛིན་པའི་གླིང་། །ཆུ་བོ་ན་ར་ཛ་ར་འབབ། །གཡས་སུ་གསེར་གླིང་གསེར་རྒྱུད་གནས། [77]།གཡོན་དུ་ཟངས་གླིང་བཀྲ་ཤིས་གནས། །ལྷོ་ཕྱོགས་རྗེའུ་རིགས་བཀོད་པའི་གླིང་། །ཆུ་བོ་སི་ཏ་སིནྡྷུ་འབབ། །གཡས་དྲང་སྲོང་འགྲོ་བ་འདུལ་བའི་གླིང་། །རབ་བྱུང་མཆོད་རྟེན་སྟོང་དང་ལྡན། །གཡོན་ན་བྲམ་ཟེ་མྱ་ངན་མེད་པའི་གླིང་། །དུར་བུ་གླིང་དུ་མྱ་ངན་འདས་པའོ། །ནུབ་ཕྱོགས་བྲམ་ཟེ་གཙང་བའི་གླིང་། །ཆུ་བོ་གྱིམ་ཤང་ཕྱི་ནང་འབབ། །གཡས་ན་བྲམ་ཟེ་ཧོས་མོ་གླིང་། །རི་ནི་ཧོས་རུ་རྩེ་མཐོན་ཡོད། །གཡོན་ན་འབྲི་མིག་དགུ་བསྐོར་བསྐོར་མཚོའི་གླིང་། །སྟོན་པས་ཀླུ་ལ་བོན་བཤད་ས། །བྱང་ན་རྨངས་རིགས་གདོལ་བའི་གླིང་། །ཆུ་བོ་པཀྵུ་གཙང་པོ་[208]འབབ། །གཡས་ན་སྟོབས་ཆེན་གྱད་ཀྱི་གླིང་། །གཡོན་ན་གཙུག་རྗེ་རྒྱལ་པོའི་གླིང་། །རི་ནི་གཙུག་རི་ཕྱུག་པོ་ཡོད། །དེ་རྒྱབ་འཁོར་མོ་གླིང་གི་མཚོ། །དེ་རྒྱབ་གླིང་ཆེན་བཅུ་དྲུག་ཡོད། །ཤར་དུ་དམུ་ཨ་བ་ད་རའི་ཡུལ། །གཡས་སུ་བྲག་སེང་གེ་བརྒྱད་བསྣོལ་ཕུག་པ། །རི་ལྷ་རི་རྩེ་མཐོན་ཤེལ་གྱི་བྲག་ཕུག་བརྒྱ་རྩ་བརྒྱད་ཡོད་པ་བདུད་མ་དྲང་ཁ་ཆེན་བཏུལ་སའོ། །གཡོན་དུ་འགྲོ་བ་འདུལ་བའི་མཆོད་རྟེན་བརྒྱ་རྩ་བརྒྱད། །ཤར་ལྷོ་ན་ཡུལ་རྒྱ་ལག་འོད་མའི་གླིང་། །རྒྱ་ཀོང་རྩེ་འཕྲུལ་གྱི་རྒྱལ་པོའི་གནས། །ལྷོ་ན་ཡུལ་ཁྲི་ཏིང་འབྱམས་པ། རིན་ཆེན་སྤུངས་རི་གཡས་ན་སྨྲ་མི་གྲོང་བདུན། གཡོན་ན་ཡུལ་པྲ་མོ་ཁྲི་འོད་སྡིག་ཅན་མི་དགུ་དྲངས་པ། ལྷོ་ན་རི་གཙུག་རུམ་འབར་བ། ནུབ་ཕྱོགས་མཚོ་མུ་ལེ་སྟོང་ལྡན་འགྲམ། གྲོང་ཁྱེར་ཆེན་པོ་ལང་ལིང་ནས། རྒྱལ་པོ་ས་ལ་གནས་པ་འོ། །གཡས་ན་[209]རྒྱལ་མོ་མོ་ཁྲིམས་གླིང་། །གཡོན་ན་མཁའ་འགྲོ་མི་རྐུན་གླིང་། །ནུབ་བྱང་མིའམ་ཅི་ཡི་གླིང་། །བྱང་ཕྱོགས་ཧོས་མོ་གླིང་དྲུག་སྟེ། །ཧོས་དང་བ་ཡིད་རང་གནས། །གཡས་སུ་ཧ་ནུ་མན་ཐ་སྤྲེལ་གྱི་གླིང་། །གཡོན་དུ་ཡུལ་པྲ་མོ་གླིང་དྲུག་གོ །གཏོ་བུ་འཁོར་བ་དྲང་བ་འོ། །བྱང་ཤར་དྷ་ལ་ཤེལ་གྱི་བྲག་ཕུག་གོ །དེ་རྒྱབ་མུ་ཁྱུད་བདལ་བའི་མཚོ། །ལྕགས་རི་དཔག་ཚད་སྟོང་དང་ལྔ་བརྒྱས་བསྐོར། །ཟངས་རི་ནམ་མཁའ་འོལ་འོལ་སྟེ། །གནམ་ནི་འཁོར་ལོ་རྩིབས་བརྒྱད་འདྲ། །ཤར་ན་ཡར་གཡེན་བཅུ་གསུམ་སྟེ། །སྲིད་སྐོས་ཕྱྭ་དང་གསུམ། དབལ་ཡོག་ཁྲིན་དང་གསུམ། དམུ་བདུད་འཚམས་དང་གསུམ། གཉེར་འོ་བཙན་དང་གསུམ། གཉེན་པོ་ལྷ་དང་བཅུ་གསུམ་གནས། ལྷོ་ནུབ་མཚམས་ན་བར་གཡེན་གཏོད་པོ་དགུ། ཉི་ཟླ་གཟའ་སྐར་གསུམ། སྤྲིན་[210]གཞའ་དལ་དང་གསུམ།

ཟེར་ལོ་རྫི་དང་གསུམ། ནུབ་བྱང་ཕྱོགས་ན་ས་གཡེན་ཆེ་བ་བཅུ་གཅིག་སྟེ། ས་བདག་ཀླུ་གཉན་གསུམ། འདྲེ་སྲིན་བྱུར་དང་གསུམ། སྨན་གཟེད་སྲིད་དང་གསུམ། གཤིན་རྗེ་ཆུད་དང་བཅུ་[78]གཅིག་གནས་སོ། །རི་ནི་གཡུང་དྲུང་དགུ་བརྩེགས་རི། །ཕྱོགས་བཞིར་གྲོང་ཁྱེར་ཕོ་བྲང་བཞི། །ཕྱི་རོལ་ར་བ་རིམ་བདུན་དང་། །རིན་ཆེན་སྣ་ལྔ་མཛེས་པ་ཡོད། །ཤིང་འཇའ་ཚོན་འོད་འབར་ར་བ་བདུན། །གསེར་དང་དངུལ་གྱི་མདའ་ཡབ་དང་། །རིན་ཆེན་འཕྲ་རྩིག་དར་བུ་ཁད། །མུ་ཏིག་དྲ་བ་དྲ་ཕྱེད་སྤྲས། །མེ་ཏོག་ཨུད་འབར་བཀྲ་བ་དང་། །རིན་པོ་ཆེ་ཡི་རྫིང་བུ་བཞི། །བྱ་ཡི་སྐད་སྙན་མཛེས་པ་དང་། །རིན་ཆེན་བཞི་བཀྲ་སྒོ་བཞི་མཛེས། །རིན་ཆེན་སྐས་དང་རྟ་བབས་མཛེས། །གྲོང་གི་བཞི་མདོ་ཆེན་པོ་བཞིར། །གཤེན་རབ་འདུན་ས་ཚལ་ཆེན་བཞི། །གསེར་དངུལ་[211]ཤེལ་དང་བཻཌཱུརྻ། །ཁྲི་བརྩིག་དར་གྱི་འབོལ་གདན་བཏིངས། །དར་ཚོན་མཛེས་པའི་སྤོད་དང་བཅས། །འཇའ་ཚོན་སྣ་ལྔའི་རྒྱབ་ཡོལ་བཅས། །གསལ་བ་འོད་ཀྱི་ཧོས་གུར་ཕུབ། །མེ་ཏོག་མཛེས་པའི་རྒྱང་འཕན་བཀྲ། །སིལ་སྙན་སྒྲ་སྒྲོགས་སྤོས་དང་ལྡན། །དེ་ནི་སྟོན་པས་བོན་བཤད་པ། །ཧོས་སྒོ་མཛོད་ལྔ་འབྱུང་སའོ། །གསས་ཆེན་རུ་བཞི་བྱོན་སའོ། །དེ་ནས་གཉེན་ཕྲན་སྟོང་དང་ལྔ་བརྒྱ་དང་། །ཧོས་དང་ལྷ་མི་བྱེ་བ་རྣམས། །སྟོན་པའི་བཀའ་ལུང་རིན་པོ་ཆེ། །ལུང་བསྟན་ཁ་ཐོན་བྱེད་པ་དང་། །ཡི་གེ་བྲིས་དང་ཉན་བསམ་བྱེད། །ཡིད་ལ་བྱེད་དང་དོན་ལ་རྟོགས། །ཧོས་ཀྱི་སྒོ་མོ་བསླབ་སའོ། །འོལ་མོ་གླིང་གི་སེམས་ཅན་རྣམས། །ལོག་པར་མི་བཏུབ་བོན་ལ་སྤྱོད། །དགེ་ལ་སྤྱོད་པ་ཤ་སྟག་སྟེ། །ཀུན་ཀྱང་བླ་མེད་རྫོགས་སངས་རྒྱས། །རི་ནི་གཡུང་དྲུང་དགུ་བརྩེགས་རི། [212]།བདེར་གཤེགས་ཀུན་གྱིས་བྱིན་བརླབས་གནས། །རང་བྱུང་རིན་ཆེན་ལྔ་ལས་གྲུབ། །དེར་ནི་གང་གནས་འགྲོ་བ་རྣམས། །ནད་མུག་མཚོན་གསུམ་མེ་ཆུ་རླུང་། །མེ་བདུན་ཆུ་གཅིག་འཇིག་དང་བྲལ། །དེ་ནས་ཕྱི་རོལ་ཕོ་བྲང་བཞི། །ཐར་བ་ཐོབ་པའི་གྲོང་ཆེན་ཡིན། །ཞིང་མཆོག་འོལ་མོ་ལུང་རིང་འདིར། །སྟོན་པ་བདེར་གཤེགས་སྟོང་འབྱུང་ངོ་། །གཡུང་དྲུང་ལྷ་ཡི་བོན་མདོ་འདུས་པ་རིན་པོ་ཆེའི་རྒྱུད་ལས། སྟོན་པ་གཤེན་རབ་ཞིང་གི་བཀོད་པ་འོལ་མོ་གླིང་བཀོད་པའི་ལེའུ་སྟེ་ཉི་ཤུ་རྩ་གཉིས་པའོ།།

གངས་ཏི་སེ་བོན་གཞུང་རིག་མཛོད་ལྟར་སྐྲུན་པ།

ཤོག་གྲངས་ནི།

Bon Foundation བོན་བཀའ་འགྱུར་ལ་པོད་སུམ་བཅུ་པ་ནས། ཨང་ཀི་དམར་པོ། (Si khron zhing chen par khrun lte gnas par 'debs khang, Chengdu 1999)

གངས་ཏི་སེ་བོན་གཞུང་རིག་མཛོད་ལ་དེབ་དང་པོ་ནས། ཨང་ཀི་སྔོན་པོ། (Gangs ti se bon gzhung rig mdzod, Amdo 2009)

⋘ ● ⋙