(21) མདོ་འདུས་ལས། ལེའུ་ཉེར་གཅིག་པ། ཆོ་འཕྲུལ་བསྟན་པ།

།།དེ་ནས་ཀོང་ཙེ་འཕྲུལ་རྒྱལ་གྱིས། །སྟོན་པ་གཤེན་རབ་མི་བོ་ལ། །རྒྱལ་སྲིད་ཕུལ་ནས་ཞུས་པའི་མདོ། །ཨེ་མ་སྟོན་པ་གཤེན་རབ་ཕུལ། །དབྱིངས་ཀྱི་ཡུམ་དང་ཡེ་ཤེས་ལྷ། །ཐབས་ཀྱི་མཆོག་དང་ཤེས་རབ་ཕུལ། །སྟོན་པ་བླ་མེད་གཤེན་རབ་ལ། །ཀོང་ཙེ་དང་བས་གུས་ཕྱག་འཚལ། [73]།སྟོན་པས་བདུད་བཏུལ་མངོན་སངས་རྒྱས། །འགྲོ་བ་འདུལ་བའི་ཐབས་མཆོག་ཏུ། །ཆོ་འཕྲུལ་ཆེན་པོ་བསྟན་པ་གང་། །འཁོར་རྣམས་ཀུན་ལ་བཤད་དུ་གསོལ། །ཞེས་ཞུས་སྟོན་པས་བཀའ་བསྩལ་བ། །འགྲོ་བ་འདུལ་བའི་ཆོ་འཕྲུལ་ལས། །ཆོ་འཕྲུལ་ཆེན་པོ་ལྔ་[196]བསྟན་ཏེ། །རང་བཞིན་གྱི་ནི་ཆོ་འཕྲུལ་དང་། །བྱིན་གྱིས་བརླབས་པའི་ཆོ་འཕྲུལ་དང་། །རྫུ་འཕྲུལ་གྱི་ནི་ཆོ་འཕྲུལ་དང་། །རྗེས་སུ་བསྟན་པའི་ཆོ་འཕྲུལ་དང་། །བསྟན་པ་རྗེས་བཞག་ཆོ་འཕྲུལ་ལོ། །རང་བཞིན་གྱི་ནི་ཆོ་འཕྲུལ་ནི། །འོག་མིན་ལྷ་ཡི་ཕོ་བྲང་ནས། །རྫོགས་སྐུ་གཤེན་ལྷ་འོད་དཀར་ལ། །གཡུང་དྲུང་སེམས་དཔའ་འབུམ་གྱིས་བསྐོར། །གསང་བ་བླ་མེད་དོན་རྣམས་བཤད། །ལྟ་བ་བོན་གྱི་འཁོར་ལོ་བསྐོར། །ས་བཅུ་ཤེས་བྱའི་སྒྲིབ་པ་སྦྱངས། །བར་ལྷ་འོད་གསལ་གནས་ཞེས་བྱ། །མགོན་གསུམ་ཕྱྭའི་གྲོང་ཁྱེར་དུ། །འགྲོ་བ་འདུལ་བའི་འཕྲིན་ལས་ལ། །གང་ལ་གང་འདུལ་སྤྲུལ་པ་འགྱེད། །ཉི་མ་དང་ནི་འོད་ཟེར་ལྟར། །བོན་གྱི་སྐུ་ལ་མ་གཡོས་ཀྱང་། །ལོངས་སྤྱོད་རྫོགས་ལ་ཅིར་ཡང་སྤྲུལ། །འོག་མིན་གནས་སུ་[197]མངོན་རྫོགས་ཀྱང་། །ཅིར་ཡང་སྤྲུལ་སྐུ་འཛམ་གླིང་དུ། །སྟོན་པ་གཤེན་རབ་མངོན་སངས་རྒྱས། །འདུལ་བ་དྲུག་དང་སུམ་ཅུ་སོ་དྲུག་སོགས། །འཛམ་གླིང་བྱེ་བ་ཕྲག་བརྒྱ་རུ། །གཤེན་རབ་བྱེ་བ་ཕྲག་བརྒྱ་བྱུང་། །ཐེག་པ་དགུ་ཡི་རིགས་རྣམས་ལ། །ཐེག་སྒོ་བྱེ་བྲག་བོན་རྣམས་བཤད། །རང་བཞིན་སྟོན་པའི་ཆོ་འཕྲུལ་ལོ། །བྱིན་གྱིས་བརླབས་པའི་ཆོ་འཕྲུལ་ནི། །སྟོན་པའི་ཞབས་ཀྱི་ལོང་བུ་དང་། །དབང་པོ་དྲུག་དང་ཕྱག་དང་དབུ། །དེ་ལས་འོད་ཟེར་བྱེ་བ་བྱུང་། །དེ་ལ་སྟོན་པ་རེ་རེ་བྱུང་། །ཀུན་ཀྱང་ཚད་མེད་བོན་བཤད་ཅིང་། །འགྲོ་བའི་དོན་རྣམས་བྱེད་པ་དང་། །སྟོན་པས་སྐུ་གཅིག་བསྟན་པ་ལ། །ནམ་མཁའ་ཟླ་གཟུགས་[198]ཆུར་གསལ་བཞིན། །སེམས་ཅན་རྣམས་ནི་རེ་རེ་བཞིན། །རང་རང་གང་མོས་སྟོན་པར་སྣང་། །རང་རང་མོས་པའི་བོན་འཆད་དང་། །བཀའ་རྟགས་བྱ་དང་ཤིང་རྣམས་དང་། །འབྱུང་བ་བཞི་དང་རི་དང་བྲག །དེ་ལ་བོན་གྱི་སྒྲ་ཡང་བྱུང་། །གསུང་གི་བྱིན་གྱིས་བརླབས་པ་འོ། །ཐུགས་ཀྱི་བྱིན་གྱིས་བརླབས་པ་ནི། །སྟོན་པ་དགོངས་པ་ལ་བཞུགས་ཚེ། །ཀོང་རྩེ་འཕྲུལ་རྒྱལ་ལ་སོགས་པས། །སྟོན་པའི་དགོངས་པ་བསྒྲུབ་པ་འོ། །སྐུ་ཡིས་བྱིན་གྱིས་བརླབས་པ་ནི། །རྒྱལ་པོ་ས་ལ་སོགས་པ་ལ། །སྟོན་པས་ཕྱག་གིས་སྤྱི་བོར་བཞག །སྟོན་པའི་སྐུ་ཡི་བྱིན་རླབས་ཞུགས་པ་འོ། །ལུང་བསྟན་བྱིན་གྱིས་བརླབས་པ་ནི། །སྟོན་པས་ཡིད་ཀྱི་ཁྱེའུ་ཆུང་ལ། །རྒྱལ་པོ་ཧོས་[199]ཀྱི་འགྲོ་བའི་དོན་གྱིས་ཤིག་དང་། །འ་ཞ་གསང་བ་[74]མདོ་སྡུད་ལ། །གསང་བོན་དུས་ལ་མ་གཡོས་པ་ལ། །ང་ཡི་གདུང་གཉེར་གྱིས་ཤིག་དང་། །མུ་ཆོ་ལྡེམ་དྲུག་སྲིད་པ་གུང་སངས་ཡུལ། །སྟོན་པ་གཤེན་རབ་ལྷ་ཡི་ཞལ་ལྟོས་དང་། །ང་ཡི་རྒྱུད་ཀྱིས་འདྲེན་པར་ཤོག་ཅེས་པའོ། །འཛིན་ནི་འདྲེན་པའི་ཤོན་རྩེས་པའོ། །རྫུ་འཕྲུལ་གྱིས་ནི་ཆོ་འཕྲུལ་ནི༑ ༑ས་ཡང་དྲུག་ཏུ་གཡོས་པ་དང་། །བདུད་ཀྱི་ཆོ་འཕྲུལ་སྣ་དགུ་བཏུལ། །འདུལ་བ་དྲུག་དང་སུམ་ཅུ་སོ་དྲུག་གིས། །འཇིག་རྟེན་དྲེགས་པ་ཅན་རྣམས་བཏུལ། །ནད་མུག་མཚོན་དང་མེ་ཆུ་རླུང་། །ས་གཡོས་པ་དང་ཐོག་འབེབས་པ། །འཇིགས་པ་བརྒྱད་ལས་འཁོར་རྣམས་སྐྱོབས། །སྟོན་པའི་སྐུ་ནི་བྱེ་བར་སྤྲུལ། །བདུད་ནི་གར་ཡིན་མ་ཤེས་དང་། །སྟོན་པའི་བ་སྤུ་བུ་ག་ནས། །ཁྲོ་འགྱེད་སྤྲུལ་པ་བྱེ་བ་སྤྲོས། །བདུད་རྣམས་སྤ་བཀོང་བགེགས་རྣམས་སྐྲག [200]།མེ་འོབས་པད་མའི་ཚལ་དུ་བསྒྱུར། །བདུད་ཀྱི་མདའ་འཕང་མེ་ཏོག་གྱུར། །རྫུ་འཕྲུལ་དག་གི་ཆོ་འཕྲུལ་ལོ། །རྗེས་སུ་བསྟན་པའི་ཆོ་འཕྲུལ་ནི། །འཕྲོག་མ་ལྔ་བརྒྱ་རྩ་གཅིག་ལ། །ཆང་བུ་བྱིན་ཏེ་ཤ་ཁྲག་ནི། །མི་ཟ་བ་ཡི་སྡོམ་པ་ཕོག །སྟག་མོ་ལྔ་ལ་བརླ་ཤ་བྱིན། །ཕྱིས་ནི་འབྲོག་གནས་ལྔ་རུ་གྱུར། །འོལ་མོ་གླིང་དུ་བཀོད་པ་རྫོགས། །འཕང་གསལ་བདུད་རི་བོན་རིར་སྒྱུར། །ཁྱུང་ལུང་དངུལ་མཁར་བརྩེགས་པ་དང་། །ལྷ་རི་གྱང་དོར་བསྟན་པ་བཞག །བསྟན་པ་བཞག་པའི་ཆོ་འཕྲུལ་ནི། །སྐུ་གཟུགས་ཞལ་སྐྱིན་སྐུ་ཡི་རྟེན། །གསུང་རབ་འབུམ་སྡེ་གསུང་གི་རྟེན། །སྐུ་གདུང་རིང་བསྲེལ་ཐུགས་ཀྱི་རྟེན། །འགྲོ་དོན་བསྟན་པ་རྣམ་གསུམ་བཞག་པ་འོ། །གཡུང་དྲུང་ལྷའི་བོན་མདོ་འདུས་པ་རིན་པོ་ཆེའི་རྒྱུད་ལས། ཆོ་འཕྲུལ་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།།

གངས་ཏི་སེ་བོན་གཞུང་རིག་མཛོད་ལྟར་སྐྲུན་པ།

ཤོག་གྲངས་ནི།

Bon Foundation བོན་བཀའ་འགྱུར་ལ་པོད་སུམ་བཅུ་པ་ནས། ཨང་ཀི་དམར་པོ། (Si khron zhing chen par khrun lte gnas par 'debs khang, Chengdu 1999)

གངས་ཏི་སེ་བོན་གཞུང་རིག་མཛོད་ལ་དེབ་དང་པོ་ནས། ཨང་ཀི་སྔོན་པོ། (Gangs ti se bon gzhung rig mdzod, Amdo 2009)

⋘ ● ⋙