(18) མདོ་འདུས་ལས། ལེའུ་བཅོ་བརྒྱད་པ། བདེར་གཤེགས་མཆོད་པ་གསང་བ་འདུས་པའི་བཀོད་པ།

།།དེ་ནས་སྟོན་པ་གཤེན་རབ་ཀྱིས། །གཡུང་དྲུང་བཀོད་པའི་གླིང་དུ་ནི། །དུང་ནི་འཕར་པོ་འཕར་གྲགས་ཏེ། །འཁོར་རྣམས་བསྡུ་པ་རབ་ཏུ་མཛད། །ཞལ་སྲོས་བདེར་གཤེགས་ཀུན་[58]འདུས་ཀྱི། །ཡོངས་སུ་རྫོགས་པའི་མཆོད་པ་མཛད། །དཀྱིལ་འཁོར་བཀྲ་གསལ་འོལ་མོ་གླིང་། །རང་བཞིན་ཚོན་གྱི་བཞི་བཀྲ་གསལ། །ཁ་དོག་ཕྱོགས་མཐུན་མཛེས་པ་འོ། །དེ་ནས་རྒྱན་རྣམས་བཀྲམ་པ་ནི། ཨཱོྃ་བདེར་གཤེགས་ཕོ་བྲང་ཉམས་དགའ་འདིར། [154]།སྟོན་པས་བཀྲ་ཤིས་ལྷ་ཡི་རྫས། །འཁོར་ལོ་དཔལ་བེའུ་པད་མ་རྒྱལ་མཚན་དང་། །གདུགས་དང་བུམ་པ་གསེར་ཉ་དུང་། །བཀྲ་ཤིས་རྫས་བརྒྱད་ཕྱོགས་མཚམས་བརྒྱད་དུ་བཀྲམ། །ཨ་དཀྱིལ་འཁོར་ལྷའི་ཕོ་བྲང་འདིར། །འཁོར་ལོས་བསྒྱུར་བའི་རྒྱལ་པོའི་རྒྱལ་སྲིད་རིན་ཆེན་བདུན། །འཁོར་ལོ་རིན་ཆེན་རྟ་མཆོག་གླང་པོ་དང་། །བཙུན་མོ་བློན་པོ་དམག་དཔོན་རིན་པོ་ཆེ། །ནོར་བུ་རིན་ཆེན་བུམ་པ་བཟང་པོའི་གཏེར། །རིན་ཆེན་སྣ་བརྒྱད་རྒྱན་དུ་ལེགས་པར་བཀོད། །མདའ་ཡབ་མེ་ལོང་མེ་ཏོག་འཕྲེང་དང་དར་བུ་ཁད། །མུ་ཏིག་དྲ་བ་དྲ་ཕྱེད་རིན་ཆེན་འཕྲེང་། །སེང་གེ་གླང་ཆེན་རྨ་བྱ་ཁྱུང་དང་ཤང་ཤང་ཏེའུ། །རྟ་མཆོག་པད་མ་ཉི་ཟླ་གདན་ལེགས་བརྒྱན། །སེང་གེ་ཆུ་སྲིན་ཁྱུང་དང་བྲམ་ཟེ་ན་དྲུག་བརྒྱན། །མཛེས་པའི་རྒྱན་དྲུག་དག་གིས་རབ་ཏུ་བརྒྱན། །བླ་བྲེ་གདུགས་དང་རྒྱལ་མཚན་བ་དན་དང་། །རྔ་ཡབ་དར་དཔྱངས་ཕྱེ་མ་འཕུར་མ་ལྡ་ལྡིས་བརྒྱན། །དེ་ནས་མཆོད་[155]པ་བཀོད་པ་ནི༑ ༑མར་མེ་མེ་ཏོག་འཕྲེང་དང་གདུག་སྤོས་དང་། །དྲི་ཆབ་བཟང་དང་ཞལ་ཟས་སིལ་སྙན་སྒྲ༑ ༑ཡིད་འོང་མཆོད་པ་སྣ་ཚོགས་བཀྲམ་བར་བྱ། །དེ་ནས་རྒྱུ་མཆོད་བྱང་ཆུབ་སེམས་བསྐྱེད་པ། །སྣོད་བཅུད་འཇིག་རྟེན་མཐའ་ཡས་ན། །འགྲོ་བ་ས་ཡི་རྟུལ་བས་གྲངས་མང་རྣམས། །བླ་མེད་གཤེན་རབ་ས་མཆོག་ཐོབ་པའི་ཕྱིར། །ནམ་མཁའ་ཇི་བཞིན་ཐུགས་རྗེ་ཆེན་པོ་ཡིས། །འགྲོ་ཀུན་བླ་མེད་གོ་འཕང་ཐོབ་པར་སེམས་བསྐྱེད་དོ། །དེ་ནས་བདུད་བགེགས་མཚམས་བཅད་ནི། ཨཱོྃ་མི་སྐྱེ་མི་འགག་མཚན་མ་མེད་པ་ཡི། །གཤེན་རབ་དག་པའི་གཡུང་དྲུང་བཀོད་པའི་གླིང་། །ལྷ་ཡི་གཞལ་ཡས་འོལ་མོ་གླིང་ཆེན་འདིར། །དགེ་ལ་བར་ཆོད་བྱེད་པའི་བདུད་དང་བགེགས། །ཁྲོ་ཆེན་རུ་བཞི་རྔམ་པའི་བྱིན་སྟོབས་ཀྱིས། །ངེས་པར་རྒྱང་མཚམས་ཆོད་ལ་ཐལ་བ་རྡུལ་དུ་རློགས། །ཤར་ཕྱོགས་[156]འཇིག་རྟེན་མཐའ་ཡས་ཀུན། །ཟོ་བོ་དབུ་དགུ་བསམ་མི་ཁྱབ། །སྣང་སྲིད་ཟོ་བོ་དབུ་དགུས་གང་། །ཤར་ཕྱོགས་གདོན་བགེགས་རྒྱང་མཚམས་ཆོད། །བསྭོ་གེ་ཞི་མྱལ་མྱལ་རྦུད།ཨ་པར་ཐུམ་དྲག་མ་རག་མ་གཞོབ་ཏུ་ཐོངས། བྱང་ཕྱོགས་འཇིག་རྟེན་མཐའ་ཡས་ཀུན། །གཟེ་མ་དབུ་དགུ་བསམ་མི་ཁྱབ། །སྣང་སྲིད་གཟེ་མ་དབུ་དགུས་གང་། །བྱང་ཕྱོགས་གདོན་བགེགས་རྒྱང་མཚམས་[59]ཆོད། །བསྭོ་རག་ཤ་གེ་ཞི་ཐུམ་དྲག་མ་རག་མ་གཞོབ་ཏུ་ཐོངས། །ནུབ་ཕྱོགས་འཇིན་རྟེན་མཐའ་ཡས་ཀུན། །རུ་ཅོ་དབུ་དགུ་བསམ་མི་ཁྱབ། །སྣང་སྲིད་རུ་ཅོ་དབུ་དགུས་གང་། །ནུབ་ཕྱོགས་གདོན་བགེགས་རྒྱང་མཚམས་ཆོད། །བསྭོ་གེ་རུད་མྱལ་མྱལ་ཐུམ། དྲག་མ་རག་མ་གཞོབ་ཏུ་ཐོངས། །ལྷོ་ཕྱོགས་འཇིག་རྟེན་མཐའ་ཡས་ཀུན། །རོམ་པོ་དབུ་དགུ་བསམ་མི་ཁྱབ། །སྣང་སྲིད་རོམ་པོ་དབུ་དགུས་གང་། །ལྷོ་ཕྱོགས་གདོན་[157]བགེགས་རྒྱང་མཚམས་ཆོད། །བསྭོ་ཡ་མ་རག་ཤ་རྦད། །ཏྲག་མ་རག་མ་གཞོབ་ཏུ་ཐོངས། །ཞེས་བརྗོད་མཚེ་ཉུངས་མཚོན་ཆ་སྤྲོ། །བགེགས་རྣམས་ལྕགས་རིའི་རྒྱབ་ཏུ་དེད་པར་བསམ། །བདག་ཉིད་གཤེན་རབ་རྫོགས་པར་བསྐྱེད། །མདུན་དུ་རིན་ཆེན་ས་གཞི་བཀྲ། །རིན་ཆེན་ཁྲི་དང་པད་མ་དང་། །སེང་གེ་ཉི་ཟླ་འཇའ་ཚོན་གདན། །གཞལ་ཡས་འཇའ་ཚོན་གུར་ནང་དུ། །རིགས་ལྔ་གཙོ་བཞི་སེམས་དཔའི་འཁོར། །མཆོད་གནས་དུས་གསུམ་བདེར་གཤེགས་བཅུ། །ཕྱོགས་བཅུའི་སངས་རྒྱས་ས་བཅུའི་གཡུང་དྲུང་སེམས། །ཕྱོགས་བཅུའི་གཤེན་རབ་སྒོ་སྲུང་བཞི། །ཕྱོགས་སྐྱོང་བཅུ་དང་སྒོ་བ་རྒྱལ་པོ་བཞི། །འདུལ་བ་དྲུག་དང་སུམ་ཅུ་རྩ་གསུམ་རྣམས། །བཀྲ་གསལ་ལྷང་ངེ་ལྷན་ནེར་བསམ། །དེ་ནས་ཐུགས་རྗེའི་ལྕགས་ཀྱུས་སྤྱན་དྲངས་ཏེ། །ཨཱོྃ་འོག་མིན་ལྷུན་གྲུབ་ཕོ་བྲང་ནས། །སྐུ་གསུམ་ཡེ་ཤེས་ལྷུན་གྲུབ་[158]ཅིང་། །ཐུགས་རྗེས་འགྲོ་བའི་དོན་མཛད་པ། །རིགས་ལྔ་བདེ་བར་གཤེགས་པ་གཤེགས་སུ་གསོལ། །དབྱིངས་ཀྱི་ཡུམ་དང་ཡེ་ཤེས་ལྷ། །ཐབས་ཀྱི་མཆོག་དང་ཤེས་རབ་ཕུལ། །སྐུ་གསུང་ཐུགས་དང་ཡོན་ཏན་འཕྲིན་ལས་ཀྱིས། །འགྲོ་བ་སེམས་ཅན་དོན་མཛད་པ། །གཙོ་བཞི་བདེར་གཤེགས་སྟོང་དང་བཅས། །འགྲོ་དོན་མཛད་ཕྱིར་གཤེགས་སུ་གསོལ། །འདས་དང་ད་ལྟ་སླད་ནས་འབྱོན། །བསྐལ་བཟང་སངས་རྒྱས་ཀུན་འདུས་སྤྲུལ། །དུས་གསུམ་བདེར་གཤེགས་གཤེགས་སུ་གསོལ། །ཕྱོགས་བཅུ་ནམ་མཁའ་ཁྱབ་ཚད་དང་། །ཐུགས་རྗེས་འགྲོ་བའི་མུན་པ་སེལ་བ་ཡི། །ཕྱོགས་བཅུའི་སངས་རྒྱས་གཤེགས་སུ་གསོལ། །ལམ་ལྔ་བགྲོད་པ་མཐར་ཕྱིན་ཅིང་། །ཕ་རོལ་ཕྱིན་བཅུས་འགྲོ་དོན་མཛད། །ས་བཅུའི་གཡུང་དྲུང་སེམས་དཔའ་གཤེགས་སུ་གསོལ། །ཐར་ལམ་འདྲེན་སྟོན་བླ་ན་མེད། །མི་ཤེས་འགྲོ་བའི་མུན་སེལ་བའི། །ཕྱོགས་བཅུའི་གཤེན་རབ་གཤེགས་སུ་གསོལ། །སྒོ་སྲུང་བཞི་དང་ཕྱོགས་སྐྱོང་བཅུ། །འདུལ་བ་དྲུག་[159]དང་སུམ་ཅུ་རྩ་གསུམ་སོགས། །འཇིག་རྟེན་སྐྱོང་རྣམས་གཤེགས་སུ་གསོལ། །ཨ་ཨཱོྃ་རཾ་ཛ་སྤུང་འདུ། ཨ་ཨ་དྲུང་སྲུངས་ཛ་ཛ། དེ་ནས་གུས་པས་[60]ཕྱག་འཚལ་ཏེ། །མེ་ཏོག་འཐོར་ཞིང་ལྷ་ཕྱག་འཚལ། ཨཱོྃ་བོན་ཉིད་ཡེ་ཤེས་ཆེན་པོའི་རང་བཞིན་ནི༑ ༑སྣང་དང་མི་སྣང་མཚན་མ་ཀུན་ལས་འདས། །སྐྱེ་འགག་སེམས་པའི་རང་བཞིན་ཉིད། །རྣམ་དག་བོན་གྱི་སྐུ་ལ་ཕྱག་འཚལ་ལོ། །འོག་མིན་གནས་ནས་ལྔ་བཅུའི་སྒྲིབ་པ་སྦྱང་། །མཚན་དང་དཔེ་བྱད་འབར་ཞིང་ལོངས་སྤྱོད་རྫོགས། །སྟོང་གསུམ་ནམ་མཁའི་ཁྱབ་ཚད་ཐུགས་རྗེ་ཅན། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཐུགས་རྗེ་ཐབས་ཀྱིས་འཁོར་བ་འདམ་ནས་འདྲེན། །བྱེ་བ་ཕྲག་བརྒྱ་འགྲོ་དོན་ཅིར་ཡང་སྤྲུལ། །འགྲོ་བ་འདྲེན་སྟོན་ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །སྐུ་གསུམ་ཡེ་ཤེས་ལྔ་ཡི་ཐུགས་རྗེ་ཡིས། །འགྲོ་བའི་དུག་ལྔ་མ་[160]ལུས་ཞི་མཛད་པ། །ལོངས་སྤྱོད་རྫོགས་སྐུ་མཚན་དང་དཔེ་བྱད་འབར། །རིགས་ལྔ་བདེ་བར་གཤེགས་ལ་ཕྱག་འཚལ་ལོ༑ ༑དབྱིངས་དང་ཡེ་ཤེས་ཐབས་དང་ཤེས་རབ་ཕུལ། །སྐུ་གསུང་ཐུགས་དང་ཡོན་ཏན་འཕྲིན་ལས་ཀྱིས། །འགྲོ་བ་མ་ལུས་ཐམས་ཅད་དོན་མཛད་པས། །གཙོ་བཞི་བདེར་གཤེགས་སྟོང་ལ་ཕྱག་འཚལ་ལོ། །ཕྱོགས་བཅུའི་དུས་གསུམ་མུ་མཐའ་མེད་པ་རུ། །ཐར་པའི་ལམ་སྟོན་འགྲོ་བ་འདྲེན་མཛད་པ། །འཁོར་བ་ཁྲི་མུན་སེལ་བའི་འོད་ཟེར་ཅན། །ཕྱོགས་བཅུའི་དུས་གསུམ་བདེར་གཤེགས་རྣམས་ལ་ཕྱག་འཚལ་ལོ། །ཕ་རོལ་ཕྱིན་བཅུའི་སྤྱོད་འདྲེན་བླ་ན་མེད། །མི་ལྡོག་གཡུང་དྲུང་ས་ཐོབ་ཐུགས་རྗེ་ཆེར་ལྡན་པས། །བདེར་གཤེགས་ཐུགས་སྲས་གཤེན་རབ་བླ་ན་མེད། །ས་བཅུའི་གཡུང་དྲུང་སེམས་དཔའ་རྣམས་ལ་ཕྱག་འཚལ་ལོ། །སྣོད་བཅུད་འཇིག་རྟེན་མཐའ་ཡས་ཀུན་གྱི་བདག །གཤེན་རབ་བསྟན་པ་སྲུང་ཞིང་འཇིག་རྟེན་འདུལ་བའོ། །སྟོན་པའི་བསྟན་པ་སྲུང་བ་དབང་དང་ལྡན། །འདུལ་བ་[161]དྲུག་དང་སུམ་ཅུ་རྩ་གསུམ་ལ། །གུས་པའི་ཚུལ་གྱིས་ཕྱག་འཚལ་ལོ། །དེ་ནས་མཆོད་པ་འབུལ་བ་ནི། །ཨཱོྃ་བདེ་བར་གཤེགས་པ་ཐམས་ཅད་རྣམས། །འགྲོ་བའི་དོན་ལ་བརྩེར་དགོངས་ནས། །བདག་གི་མཆོད་ཡོན་བཞེས་ཕྱིར་དུ། །གཞའ་ཚོན་བདེ་ལེགས་གདན་ལ་བཞུགས། །པད་མ་ཉི་ཟླ་རིན་ཆེན་ཁྲི། །སེང་གེ་གླང་ཆེན་རྟ་འབྲུག་ཁྱུང་། །མཛེས་པའི་གདན་ལ་བཞུགས་སུ་གསོལ། །ཕྱོགས་བཅུ་འཇིག་རྟེན་མཐའ་ཡས་ན། །ནམ་མཁའ་མཉམ་པ་མཆོད་པའི་སྤྲིན། །བསྐྱེད་ནི་འབྱུང་བ་ལྔ་ལ་བསྐྱེད། །གྲུབ་ནི་ལོངས་སྤྱོད་མཆོད་པར་གྲུབ། །བསགས་ནི་དད་ཅིང་མོས་པར་བསགས། །དམིགས་མེད་ཐུགས་རྗེ་བྱིན་གྱིས་བརླབས། །འབུལ་ནི་བདེར་གཤེགས་ལྷ་ལ་འབུལ། །དོན་ནི་འགྲོ་བའི་དོན་ཕྱིར་བཞེངས། །གཟུགས་སྒྲ་དྲི་རོ་རེག་བྱས་[61]བརྒྱན། །དབང་པོ་སྤྱོད་ཡུལ་མཆོད་པའི་སྤྲིན། [162]།མར་མེ་སྣང་གསལ་ཉི་ཟླའི་འོད། །མཛེས་ནི་མི་རྟོག་རྒྱན་དང་ལྡན། །བདུག་སྤོས་དྲི་ཞིམ་སྤྲིན་དཔུང་འཁྲིགས། །དྲི་ཆབ་བསིལ་བྱེད་ཁྲུས་ཀྱི་ཆུ། །ཞལ་ཟས་རོ་མཆོག་ལྷ་ཡི་ཟས། །བླ་རེ་འཕན་གདུགས་རྒྱལ་མཚན་མཛེས། །རོལ་མོ་རྔ་གཤང་སིལ་སྙན་དུང་། །མངོན་སུམ་ཡིད་ཀྱིས་སྤྲུལ་ཅིང་བཤམས། །བཀྲ་ཤིས་རྫས་བརྒྱད་རིན་ཆེན་སྣ་བརྒྱད་མཛེས། །མཆོད་སྤྲིན་ནམ་མཁའ་མཉམ་པ་རྣམས། །དུས་གསུམ་བདེར་གཤེགས་འཁོར་བཅས་ལ༑ ༑འགྲོ་བའི་དོན་དུ་འབུལ་ལགས་ན། །ཐུགས་རྗེས་བཞེས་ལ་འགྲོ་དོན་ལྷུན་གྲུབ་ཤོག །དེ་ནས་བཤགས་པ་བྱ་བ་ནི། །ཨཱོྃ་དུས་གསུམ་བདེར་གཤེགས་བླ་མེད་དགོངས་སུ་གསོལ། །བདག་ནི་མི་མཁས་གཏི་མུག་མུན་བློ་ཡིས། །ལུས་ཀྱི་སྒོ་ནས་སྡིག་སྤྱོད་སོལ་དྲིས་ལྟ་བུ་ཡི། །མི་ཚངས་སྤྱོད་དང་རྐུ་ཕྲོག་བསད་བཅད་སོགས། །མི་དགེ་སྡིག་པར་གྱུར་པ་ཅི་བགྱིས་པ། །མི་འཆབ་[163]གནོང་ཞིང་འགྱོད་པས་རབ་ཏུ་བཤགས། །བདེར་གཤེགས་ཐུགས་རྗེས་རབ་ཏུ་བྱང་བར་མཛོད། །བདག་ནི་མི་མཁས་འདོད་ཆགས་དབང་གྱུར་ཏེ། །ངག་གིས་སྡིག་བྱས་དུག་ཚེར་ལྟ་བུ་ཡི། །རྫུན་དང་དབྱེན་ཕྲ་ངག་འཁྱལ་ཚིག་རྩུབ་སོགས། །མི་དགེ་སྡིག་པར་གྱུར་བ་ཅི་མཆིས་པ། །མི་འཆབ་གནོང་ཞིང་འགྱོད་པས་རབ་ཏུ་བཤགས། །བདེར་གཤེགས་ཐུགས་རྗེས་རབ་ཏུ་བྱང་བར་མཛོད། །བདག་ནི་མི་མཁས་ཞེ་སྡང་དབང་གྱུར་པས། །ཡིད་ཀྱིས་སྡིག་བྱས་མུན་ནག་གླིང་ལྟ་བུའི། །བརྣབ་སེམས་གནོད་སེམས་ལོག་པར་ལྟ་ལ་སོགས། །མི་དགེ་སྡིག་པར་གྱུར་པ་ཅི་མཆིས་པ། །མི་འཆབ་གནོང་བའི་འགྱོད་པས་རབ་ཏུ་བཤགས། །བདེར་གཤེགས་ཐུགས་རྗེས་རབ་ཏུ་བྱང་བར་མཛོད། །ཕྱི་དྲང་སྲོང་འདུལ་ཁྲིམས་ཉམས་དང་འཆལ་བ་དང་། །བར་གཡུང་དྲུང་སེམས་[164]ཀྱི་བསླབ་པ་ཉམས་པར་གྱུར་པ་དང་། །ནང་ཨ་དཀར་སྔགས་ཀྱི་དམ་ཚིག་ཆག་ཉམས་དང་། །དོན་རྫོགས་ཆེན་ལྟ་སྤྱོད་དང་འཆོར་པ་དང་། །ཐེག་དགུ་བོན་སྒོ་ལོག་པར་སྤྱོད་གྱུར་པ། །ལམ་ཕ་རོལ་ཕྱིན་བཅུར་མི་མཐུན་སྤྱོད་པ་དང་། །ཉོན་མོངས་སྒྲིབ་པ་མུན་ནག་གླིང་ལྟ་བུ། །ལས་ཀྱི་སྒྲིབ་པ་ལྕགས་ལ་བཙའ་ཞེན་འདྲ། །ཤེས་བྱའི་སྒྲིབ་པ་རྣམ་རྟོག་ལ་བོ་ཆེ། །སྒོ་གསུམ་ཉམས་པར་གྱུར་པའི་སྡིག་དང་སྒྲིབ། །མ་རིག་འཁྲུལ་པའི་ལས་སྤྱོད་ཅི་བགྱིས་པ། །མཆོད་འོས་བླ་མེད་བདེར་གཤེགས་སྤྱན་སྔ་རུ༑ ༑མི་འཆབ་གནོང་པའི་འགྱོད་པས་སོ་སོར་བཤགས། །སླད་ཆད་མི་བགྱིད་སྡོམ་པས་བཟུང་པར་བགྱིད། །ཨ་དཀར་ཨ་རྨད་དུ་ཏྲི་སུ་ནག་པོ་སྡིག་སྒྲིབ་མལ་མལ་སྭཱཧཱ། ཞེས་བརྗོད་སྡིག་པ་[62]ཐམས་ཅད་བཤགས། །དེ་ནས་ཀུན་འདུས་བདེར་གཤེགས་བསྟོད་པ་འབུལ་བ་ནི། །བོན་སྐུ་ཁྱབ་གདལ་དམིགས་[165]མེད་རྒྱ་མ་ཆད། །རྟོགས་པ་ཆེན་པོ་ལྷུན་གྲུབ་འདུས་མ་བྱས། །སྐུ་གསུམ་འབྱུང་གནས་བ་ག་ཡུམ་གྱི་ཀློང་། །སྐྱེ་མེད་བོན་གྱི་སྐུ་ལ་ཕྱག་འཚལ་བསྟོད། །བོན་སྐུ་ཐུགས་རྗེའི་ངང་ལ་འགྲོ་དོན་དུ། །གང་ལ་གང་འདུལ་གཟུགས་སྐུ་རྣམ་པ་གཉིས། །ལོངས་སྤྱོད་རྫོགས་སྐུས་ས་བཅུའི་སྒྲིབ་པ་སྦྱོང་། །ཅིར་ཡང་སྤྲུལ་སྐུས་རིགས་དྲུག་གནས་ནས་འདྲེན། །བདེར་བར་གཤེགས་པའི་སྐུ་ལ་ཕྱག་འཚལ་བསྟོད། །བོན་ཉིད་ཡེ་ཤེས་དབྱིངས་ཀྱི་རང་བཞིན་ལ། །ཀུན་སྣང་ཁྱབ་པའི་འཁོར་ལོ་རིགས་ཀྱི་གཙོ། །སྐུ་མདོག་དཀར་འབར་མཚན་དང་དཔེ་བྱད་ལྡན། །འཁོར་ལོ་ཞགས་པས་ན་རག་འདམ་ནས་འདྲེན། །བོན་སྐུ་ཀུན་སྣང་ཁྱབ་པ་ལ་ཕྱག་འཚལ་བསྟོད། །མེ་ལོང་ཡེ་ཤེས་གཡུང་དྲུང་རིགས་ཀྱི་གཙོ། །སྐུ་མདོག་དཀར་གསལ་གཡུང་དྲུང་ལུ་གུ་རྒྱུད། །མཚན་དང་དཔེ་བྱད་ལོངས་[166]སྤྱོད་རྫོགས། །གསལ་བ་རང་བྱུང་སྐུ་ལ་ཕྱག་འཚལ་བསྟོད། །མཉམ་ཉིད་ཡེ་ཤེས་རིན་ཆེན་རིགས་ཀྱི་གཙོ། །སྐུ་མདོག་སྔོ་གསལ་རིན་ཆེན་ཞགས་པ་འཛིན། །མཚན་དང་དཔེ་བྱད་ལོངས་སྤྱོད་རྫོགས། །དགེ་ལྷ་གར་ཕྱུག་སྐུ་ལ་ཕྱག་འཚལ་བསྟོད། །སོ་སོར་ཀུན་རྟོག་པད་མ་རིགས་ཀྱི་གཙོ། །སྐུ་མདོག་དམར་གསལ་པད་མ་ཐུགས་རྗེ་ཞགས། །མཚན་དང་དཔེ་བྱད་ལོངས་སྤྱོད་རྫོགས། །བྱེ་བྲག་དངོས་མེད་སྐུ་ལ་ཕྱག་འཚལ་བསྟོད། །བྱ་གྲུབ་ཡེ་ཤེས་ཡོན་ཏན་རིགས་ཀྱི་གཙོ། །སྐུ་མདོག་ལྗང་འབར་རྒྱ་གྲམ་ཞགས་པ་འཛིན། །མཚན་དང་དཔེ་བྱད་ཀུན་བརྗིད་ལོངས་སྤྱོད་རྫོགས། །དགའ་བ་དོན་གྲུབ་སྐུ་ལ་ཕྱག་འཚལ་བསྟོད། །རིགས་ལྔ་བདེར་གཤེགས་ཀུན་འདུས་གཙོ། །འཁོར་ནི་རིགས་ཀྱི་སེམས་དཔའ་བཅས། །ཐུགས་རྗེ་ལོངས་སྤྱོད་རྫོགས་པར་བཞུགས། །རིགས་ལྔ་བདེར་གཤེགས་འདུས་ལ་ཕྱག་འཚལ་བསྟོད། །ཨཱོྃ་སྟོང་གསུམ་འཇིག་རྟེན་མཐའ་ཡས་ན། །ནམ་མཁའ་[167]ཇི་བཞིན་ཐུགས་རྗེས་ཁྱབ། །སྟོན་པའི་འོད་ཟེར་ཡིག་འབྲུ་གསལ། །མདངས་ལྡན་པད་མ་སེར་པོ་ལ། །ཡིག་འབྲུ་ཨཱོྃ་གྱི་རང་བཞིན་ལ། །དབྱིངས་ཀྱི་ཀློང་ནས་བསྐྱེད་པ་ཡི། །ཡུམ་ཆེན་ས་ཏྲིག་ཨེར་སངས་ནི། །སྐུ་མདོག་མི་འགྱུར་གསེར་གྱི་སྙིང་པོ་འདྲ། །གསེར་ལ་གསེར་གྱི་འོད་འབར་རྒྱན་གྱིས་སྤྲས། །འཇའ་ཚོན་སྤེལ་ལེགས་ཇི་བཞིན་དུ། །རྒྱན་དང་ཆ་ལུགས་གཞལ་ཡས་མཛེས། །ཕྱག་མཚན་གཡས་ན་དཔའ་བོ་འབྲུ་ལྔ་བསྣམས། །ཡེ་ཤེས་ལྔ་བ་ཡི་ཐུགས་རྗེ་ཤར་བའི་བརྡ། །ཕྱག་གཡོན་སྣང་གསལ་གསེར་གྱི་མེ་ལོང་བསྣམས། །འཁོར་འདས་[63]བོན་རྣམས་སལེ་གསལ་བའི་རྟགས། །དབུ་རྒྱན་རྣ་རྒྱན་མགུལ་ཆུ་སེ་མོ་དོ། །ཕྱག་གདུབ་ཞབས་གདུབ་རིན་ཆེན་ཆུན་པོས་སྤྲས། །སྐུ་ལ་མཚན་དང་དཔེ་བྱད་རབ་ཏུ་རྫོགས། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི། །ལྷ་མོ་ཉིས་བརྒྱ་ལྔ་བཅུའི་འཁོར་གྱིས་བསྐོར། [168]།དབྱིངས་ཡུམ་ཆེན་མོ་ས་ཏྲིག་ཨེར་ཏི་སངས། །དབྱིངས་ཀྱི་ལྷ་མོ་འཁོར་བཅས་ཕྱག་འཚལ་བསྟོད། །ཨཱོྃ་སྟོང་གསུམ་འཇིག་རྟེན་མཐའ་ཡས་ནས། །ནམ་མཁའ་ཇི་བཞིན་ཐུགས་རྗེས་ཁྱབ། །སྟོན་པའི་འོད་ཟེར་ཡིག་འབྲུར་གསལ། །མདངས་ལྡན་པད་མ་དཀར་པོ་ལ། །ཡིག་འབྲུ་ཨ་ཡི་རང་བཞིན་ལས། །ཡེ་ཤེས་ལྷ་ལས་བསྐྱེད་པ་ཡི། །ལྷ་ཆེན་གཤེན་ལྷ་འོད་དཀར་ནི། །སྐུ་མདོག་མི་འགྱུར་ཤེལ་གྱི་སྙིང་པོ་འདྲེན། །ཤེལ་ལ་ཤེལ་གྱི་འོད་འབར་རྒྱན་གྱིས་སྤྲས། །འཇའ་ཚོན་སྤེལ་ལེགས་ཇི་བཞིན་དུ། །རྒྱན་དང་ཆ་ལུགས་གཞལ་ཡས་མཛེས། །ཕྱག་མཚན་གཡས་ན་ཐུགས་རྗེའི་ལྕགས་ཀྱུ་བསྣམས། །འཁོར་བ་འདམ་ནས་འདྲེན་པའི་བརྡ། །ཕྱག་མཚན་གཡོན་ན་རིན་ཆེན་རྒྱལ་མཚན་འཛིན། །ཐུགས་རྗེ་བཀའ་རྟགས་ནུབ་པ་མེད་པའི་བོན། །དབུ་རྒྱན་རྣ་རྒྱན་མགུལ་ཆུ་སེ་མོ་དོ། །ཕྱག་གདུབ་ཞབས་[169]གདུབ་རིན་ཆེན་ཆུན་པོས་སྤྲས། །སྐུ་ལ་མཚན་དང་དཔེ་བྱད་རབ་ཏུ་རྫོགས། །ཞི་བའི་རྒྱན་གྱིས་རབ་ཏུ་བརྒྱན། །ལྷ་ཆེན་གཤེན་ལྷ་འོད་དཀར་གྱི། །སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༑ ༑ལྷ་ཆེན་ཉིས་བརྒྱ་ལྔ་བཅུ་འཁོར་བཅས་ལ། །གུས་པས་ཕྱག་འཚལ་མཚན་བསྟོད་དོ། །ཡེ་ཤེས་ལྷ་ལ་ཕྱག་འཚལ་བསྟོད། །ཐུགས་རྗེ་ཅན་ལ་ཕྱག་འཚལ་ལོ། །ཨཱོྃ་སྟོང་གསུམ་འཇིག་རྟེན་མཐའ་ཡས་ན། །ནམ་མཁའ་ཇི་བཞིན་ཐུགས་རྗེས་ཁྱབ། །སྟོན་པའི་འོད་ཟེར་ཡིག་འབྲུ་གསལ། །མདངས་ལྡན་པད་མ་དམར་པོ་ལ། །ཡིག་འབྲུ་ཧའི་རང་བཞིན་ལ། །ཐབས་ཀྱི་མཆོག་ལས་བྱུང་བ་ཡི། །སྲིད་པ་སངས་པོ་འབུམ་ཁྲི་ལ། །སྐུ་མདོག་མི་འགྱུར་དངུལ་གྱི་སྙིང་པོ་འདྲ། །དངུལ་ལ་རྔུལ་གྱི་འོད་འབར་རྒྱན་གྱིས་སྤྲས། །འཇའ་ཚོན་སྤེལ་ལེགས་ཇི་བཞིན་དུ། །རྒྱན་དང་ཆ་ལུགས་གཞལ་ཡས་མཛེས། [170]།ཕྱག་མཚན་གཡས་ན་རིན་ཆེན་རྒྱལ་མཚན་འཛིན། །ཐུགས་རྗེ་ནུབ་པ་མེད་པའི་རྟགས། །ཕྱག་གཡོན་གཡུང་དྲུང་འཁོར་ལོ་བསྣམས། །འགྱུར་མེད་འཁོར་ལོ་བསྐོར་བའི་རྟགས། །དབུ་རྒྱན་རྣ་རྒྱན་མགུལ་ཆུ་སེ་མོ་དོ། །ཕྱག་གདུབ་ཞབས་གདུབ་རིན་ཆེན་ཆུན་པོས་སྤྲས། །སྐུ་ལ་མཚན་དང་དཔེ་བྱད་རབ་ཏུ་རྫོགས། །སྲིད་པ་སངས་པོ་འབུམ་ཁྲི་དང་། །སྐུ་གསུང་ཐུགས་དང་ཡོན་ཏན་འཕྲིན་ལས་ཀྱི། །སྲིད་པ་ཉིས་བརྒྱ་ལྔ་བཅུ་འཁོར་བཅས་ལ། །གུས་པས་ཕྱག་[64]འཚལ་མཚན་བསྟོད་དོ། །ཐབས་ཀྱི་མཆོག་ལ་ཕྱག་འཚལ་ལོ། །ཨཱོྃ་སྟོང་གསུམ་འཇིག་རྟེན་མཐའ་ཡས་ན། །ནམ་མཁའ་ཇི་བཞིན་ཐུགས་རྗེས་ཁྱབ། །སྟོང་བའི་འོད་ཟེར་ཡིག་འབྲུ་གསལ། །མདངས་ལྡན་པད་མ་སྔོན་པོ་ལ། །ཡིག་འབྲུ་འ་ཡི་རང་བཞིན་ལ། །ཤེས་རབ་མཆོག་ལས་བསྐྱེད་པ་ཡི། །སྟོན་པ་གཤེན་རབ་མི་[171]བོ་ནི། །སྐུ་མདོག་རིན་ཆེན་སྙིང་པོ་འདྲ། །རིན་ཆེན་བཻ་ཌཱུརྻ་འོད་འབར་རྒྱན་གྱིས་སྤྲས། །འཇའ་ཚོན་སྤེལ་ལེགས་ཇི་བཞིན་དུ། །རྒྱན་དང་ཆ་ལུགས་གཞལ་ཡས་ཁང་། །ཕྱག་མཚན་གཡས་ན་རིན་ཆེན་ཆག་ཤིང་བསྣམས། །རང་བཞིན་བོན་རྣམས་ནུབ་པ་མེད་པའི་རྟགས། །གཡོན་པ་རིན་ཆེན་ཧོས་རུ་འཛིན། །འགྲོ་བའི་ནད་གསོ་ཅི་སྦྱིན་མཛད། །དབུ་རྒྱན་རྣ་རྒྱན་མགུལ་ཆུ་སེ་མོ་དོ། །ཕྱག་གདུབ་ཞབས་གདུབ་རིན་ཆེན་ཆུན་པོས་སྤྲས། །སྐུ་མདོག་མཚན་དང་དཔེ་བྱད་རབ་ཏུ་རྫོགས། །སྟོན་པ་གཤེན་རབ་མི་བོ་དང་། །སྐུ་གསུང་ཐུགས་དང་ཡོན་ཏན་འཕྲིན་ལས་ཀྱི། །གཤེན་རབ་ཉིས་བརྒྱ་ལྔ་བཅུ་འཁོར་བཅས་ལ། །གུས་པས་ཕྱག་འཚལ་མཚན་བསྟོད་དོ། །ཤེས་རབ་ཕུལ་ལ་ཕྱག་འཚལ་ལོ། །དེ་ནས་ཕྱོགས་བཅུའི་བདེར་གཤེགས་ལ་རྣམས་ལ་བསྟོད་པ་ནི། [172]ཨཱོྃ་ཤར་གྱི་ཐར་ལམ་བདེ་འབྱེད་ནི། །དཀར་གསལ་འཁོར་ལོ་དཔལ་བེའུ་བསྣམས། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །ཐུགས་རྗེ་བྱམས་ཀློང་ལ་སོགས་པའི། །གཡུང་དྲུང་རིགས་ཀྱི་སེམས་དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །ལྷོ་ཕྱོགས་ལེགས་པ་ཀུན་འབྱུང་ནི། །སྔོན་གསལ་པད་མ་རྒྱལ་མཚན་བསྣམས། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །ཤེས་རབ་གསལ་སྒྲོན་ལ་སོགས་པའི། །རིན་ཆེན་རིགས་ཀྱི་སེམས་དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །ནུབ་ཕྱོགས་སྙོམས་པ་ལྷུན་གྲུབ་ནི། །དམར་གསལ་གདུགས་དང་བུམ་པ་འཛིན། །རྒྱན་དང་ཆ་ལུགས་གཞལ་ཡས་ཁང་། [173]།མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །མཐུ་དབང་སྟོབས་ཆེན་ལ་སོགས་པའི། །པད་མ་རིགས་ཀྱི་སེམས་དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །བྱང་ཕྱོགས་སྲིད་པ་བསྐོས་འདེབས་ནི། །ལྗང་འབར་དུང་དང་གསེར་ཉ་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །གསེར་འོད་འབར་བ་ལ་སོགས་སྟེ། །འཁོར་ལོ་རིགས་ཀྱི་སེམས་[65]དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །ཤར་ལྷོ་ས་མཁན་ལམ་མཆོག་ནི། །སྐུ་མདོག་དཀར་སྔོན་སྒྲོན་མེ་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །ནམ་མཁའ་སྣང་བྱེད་ལ་སོགས་ཏེ། །སྣ་ཚོགས་རིགས་ཀྱི་སེམས་[174]དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །ལྷོ་ནུབ་མ་རིག་མུན་སེལ་ནི། །དམར་སྔོན་ཉི་མ་ཟླ་བ་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྫོགས་པར་བཞུགས། །མི་ཤེས་མུན་སེལ་ལ་སོགས་པའི། །དོན་དམ་རིགས་ཀྱི་སེམས་དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །ནུབ་བྱང་ཐམས་ཅད་མཁྱེན་གཟིགས་ནི། །སྐུ་མདོག་དམར་ལྗང་གླེགས་བམ་བསྣམས། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །སྒྲིབ་པ་ཀུན་སེལ་ལ་སོགས་པའི། །དྲི་མེད་རིགས་ཀྱི་སེམས་དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །བྱང་ཤར་ཡེ་ཤེས་འབྱུང་གནས་ནི། །དམར་ལྗང་ཐུགས་རྗེ་ཞགས་པ་བསྣམས། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །སྨོན་ལམ་མཐའ་ཡས་ལ་སོགས་ཏེ། །སྣ་ཚོགས་ཀུན་འབྱུང་སེམས་[175]དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །སྟེང་ཕྱོགས་སྡུག་བསྔལ་ནད་སེལ་ནི། །སྐུ་མདོག་མཁའ་འདྲ་བ་དན་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྫོགས་པར་བཞུགས། །ཡེ་ཤེས་དབང་ཐོབ་ལ་སོགས་པའི། །ཀུན་ཁྱབ་གཡུང་དྲུང་སེམས་དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །འོག་ཕྱོགས་ཆུ་བོ་བཞི་སྒྲོལ་ནི། །སྐུ་མདོག་མཐིང་ནག་བུམ་པ་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྫོགས་པར་བཞུགས། །གཡུང་དྲུང་བརྟན་བྱེད་ལ་སོགས་པའི། །འགྱུར་མེད་གཡུང་དྲུང་སེམས་དཔས་བསྐོར། །དེ་ལ་ཕྱག་འཚལ་མཚན་བསྟོད་དོ། །དེ་ནས་ལྷ་གཤེན་རྣམས་ལ་བསྟོད་པ་ནི། །དབུས་ཕྱོགས་མ་པང་དབྱིངས་ཆེན་ནི། །མཐིང་སྔོན་རྒྱ་མཚོ་[176]འཆིང་རྣམས་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྫོགས་པར་བཞུགས། །ཡེ་ཤེས་དྲི་མེད་སྙིང་པོ་ལ་སོགས་པའི། །འཁོར་བ་སྤངས་བའི་གཤེན་རབ་བཅས། །དེ་ལ་ཕྱག་འཚལ་མཚན་བསྟོད་དོ། །ཤར་ཕྱོགས་འོད་དཀར་[66]གནས་འཛིན་ནི། །དཀར་གསལ་འོད་ཀྱི་འཁོར་ལོ་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །ལྷ་གཤེན་ཡེ་ཤེས་མེ་ཏོག་སྙིང་པོ་ལ་སོགས་པའི། །ལྷ་གཤེན་རྣམས་ལ་ཕྱག་འཚལ་མཚན་བསྟོད་དོ། །བྱང་ཕྱོགས་ཡེ་དབང་རྒྱལ་པོ་ནི། །ལྗང་འབར་དབང་གི་གབ་རྩེ་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །ལྷ་གཤེན་བདུད་རྩི་གྲུབ་པ་ལ་སོགས་ཏེ། །ལྷ་གཤེན་རྣམས་ལ་ཕྱག་འཚལ་མཚན་བསྟོད་དོ། །ནུབ་ཕྱོགས་ཡེ་སྲིད་ལྷ་ཆེན་ནི། །དམར་[177]འབར་པད་མ་སྡོང་པོ་བསྣམས། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་འབར། །སྐུ་ནི་ལོངས་སྤྱོད་རྫོགས་པར་བཞུགས། །ལྷ་གཤེན་ཐུགས་རྗེ་འགྱུར་མེད་སོགས། །ལྷ་གཤེན་རྣམས་ལ་ཕྱག་འཚལ་བསྟོད། །ལྷོ་ཕྱོགས་ཁྲི་རྒྱལ་ཁུག་པ་ནི། །གསེར་འོད་སྐོས་འདེབས་ཆགས་ཤིང་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྫོགས་པར་བཞུགས། །ཡེ་ཤེས་ཐུགས་རྗེ་ཀུན་སྒྲོལ་སོགས། །ལྷ་གཤེན་རྣམས་ལ་ཕྱག་འཚལ་བསྟོད། །ཤར་ལྷོ་གར་གསས་བཙན་པོ་ནི། །དཀར་འབར་སྟོང་རི་ཆེམ་པ་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྫོགས་པར་བཞུགས། །ཡེ་ཤེས་ཚངས་པ་གསལ་ལྡན་སོགས། །ལྷ་གཤེན་རྣམས་ལ་ཕྱག་འཚལ་བསྟོད། [178]།ལྷོ་ནུབ་གསས་རྗེ་རྨང་པོ་ནི། །དམར་འབར་ཁྲི་ལོ་གནམ་གྲགས་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྫོགས་པར་བཞུགས། །ཡེ་གཤེན་ལྕེ་རྒྱལ་པར་ཏི་སོགས། །ལྷ་གཤེན་རྣམས་ལ་ཕྱག་འཚལ་བསྟོད། །ནུབ་བྱང་གནམ་གསས་ཁྱུང་རུམ་ནི། །ལྗང་འབར་འཕར་པོ་འཕར་གྲགས་འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྫོགས་པར་བཞུགས། །ཏི་སངས་རང་ཞི་ལ་སོགས་པ། །ལྷ་གཤེན་རྣམས་ལ་ཕྱག་འཚལ་བསྟོད། །བྱང་ཤར་རྒོད་གསས་མཁའ་འགྱིང་ཁ། །དཀར་སེར་ཉི་ཞལ་ཟླ་ཞལ་བསྣམས། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྫོགས་པར་བཞུགས། །ཡེ་གཤེན་སྣང་བ་མདོག་ཅན་ལ་[179]སོགས་པ། །ལྷ་གཤེན་རྣམས་ལ་ཕྱག་འཚལ་བསྟོད། །སྟེང་ཕྱོགས་མཁའ་འགྱིང་དཀར་པོ་ནི། །དཀར་འབར་རིན་ཆེན་ཁྲི་གདུགས་[67]འཛིན། །རྒྱན་དང་ཆ་ལུགས་གཞལ་ཡས་ཁང་། །མཚན་དང་དཔེ་བྱད་རབ་ཏུ་རྒྱས། །སྐུ་ནི་ལོངས་སྤྱོད་རྗོགས་པར་བཞུགས། །ཚངས་པ་གསལ་སྒྲོན་ལ་སོགས་པ། །ལྷ་གཤེན་རྣམས་ལ་ཕྱག་འཚལ་ལོ། །དེ་ནས་གཤེན་རབ་བཀའ་འཁོར་བསྟོད་པ་ནི། །འོལ་མོ་གླིང་ཆེན་ཡེ་ནས་གྲུབ་པའི་གནས། །ལྷ་བོན་རྒྱལ་པོན་ཡེ་ནས་གྲུབ་པའི་གཤེན། །ཡོ་ཕྱི་རྒྱལ་བཞད་ཐུགས་རྗེ་འབྱུང་བའི་གནས། །སྟོན་པ་གཤེན་རབ་འཁོར་བ་གནས་འདྲེན་གཤེན། །སྟོན་པ་ལོངས་སྤྱོད་རྫོགས་ལ་ཕྱག་འཚལ་བསྟོད། །ལྷ་ཟ་བཟང་དྲུག་གསས་ཟ་ངང་དྲུག་དང་། །དཔོ་ཟ་ཐང་མོ་ཧོས་ཟ་རྒྱལ་མེད་མ༑ ༑ཀོང་ཟ་[180]འཕྲུལ་བསྒྱུར་ཀོང་ཟ་ཁྲི་ལྕམ་དང་། །བདེར་གཤེགས་འབྱུང་བའི་ཡུམ་ལ་ཕྱག་འཚལ་བསྟོད། །རྨ་ལོ་གཡུ་ལོ་ཐུགས་རྗེའི་སྲས། །གཏོ་བུ་དཔྱད་བུ་སྐུ་ཡི་སྲས། །ལྷ་བུ་སྲས་བུ་ཕྱྭ་ཡི་སྲས། །ལུང་འདྲེན་རྒྱུད་འདྲེན་ཧོས་རྒྱུད་སྲས། །འཕྲུལ་བུ་ཀོང་བུ་ཀླུ་ཡི་སྲས། །སྟོན་པའི་རྒྱལ་ཚབ་རྣམས་ལ་ཕྱག་འཚལ་ལོ། །ཧོས་སྒོ་འབྱེད་ཅིང་གྱེར་སྒོ་འཛིན། །གཤེན་རབ་རྒྱུད་འཛིན་བསྟན་པ་འཛིན། །ལོ་ཙཱ་དྲུག་དང་མཁས་པ་བཞི། །རྒྱལ་ཐེབས་བླ་མ་རྣམས་ལ་ཕྱག་འཚལ་བསྟོད། །ནམ་མཁའི་བ་དན་ཅན་ལ་སོགས། །ཡེ་གཤེན་བཅུ་གསུམ་ཚོགས་ལ་ཕྱག་འཚལ་བསྟོད། །དབལ་བོན་རོམ་པོ་ལ་སོགས་ཏེ། །ཡར་གཡེན་ཁམས་རྣམས་འདུལ་མཛད་པའི། །འདུལ་བ་བཅུ་གསུམ་ཚོགས་ལ་ཕྱག་འཚལ་བསྟོད། །ཉི་བོན་དྲང་མ་འོད་དྲོ་ལ་སོགས་ཏེ། །བར་གཡེན་ཁམས་རྣམས་[181]འདུལ་མཛད་པ། །འདུལ་བ་དགུ་ལ་ཕྱག་འཚལ་ལོ། །ཀླུ་བོན་དབྱར་སྙན་གྱིམ་བུ་ལ་སོགས་ཏེ། །ས་གཡེན་ཁམས་རྣམས་འདུལ་མཛད་པའི། །འདུལ་བ་བཅུ་གཅིག་ལ་ཕྱག་འཚལ་བསྟོད། །རིགས་དྲུག་ཁམས་རྣམས་འདུལ་མཛད་པའི། །གསལ་འབར་ཀུན་ཤེས་ལ་སོགས་ཏེ། །འདུལ་བའི་གཤེན་པོ་དྲུག་ལ་ཕྱག་འཚལ་ལོ། །དེ་ནས་འཛབ་བསྟོད་པ་ནི། ཨ་ཨཱོྃ་ཧཱུྃ་རཾ་ཛ་སལེ་ལྷན་ནེ་འདུ། ཨ་ཨཱོྃ་ཧཱུྃ་རཾ་ཛ་ཉི་རི་འབར་ར་དྲང་། ཨ་ཨཱོྃ་ཧཱུྃ་རཾ་ཛ་ཨག་ཤོ་མུ་ཡེ་ཁང་། ཨ་ཨཱོྃ་ཧཱུྃ་རཾ་ཛ་ཤེ་ཐུན་ཏྲང་མ་སྤུངས། ཨ་ཨཱོྃ་ཧཱུྃ་རཾ་ཛ་ཉི་རི་འབར་ར་ཧ་ར་ཁི་ཁར་སྤུངས། །ཨ་ཨཱོྃ་ཧཱུྃ་རཾ་ཛ་སྐྱེ་མི་དྲུང་མུ་སྤུངས། ཨ་ཨཱོྃ་ཧཱུྃ་རཾ་ཛ་སད་གྱེར་ཝེར་རོ་འདུ། ཨ་ཨཱོྃ་ཧཱུྃ་རཾ་ཛ་བིང་ང་སད་བྲུཾ་སྤུངས། ཨ་ཨཱོྃ་ཧཱུྃ་རཾ་ཛ་ཡང་རཾ་ཁཾ་སྲུཾ་འདུ། [182]སྐུ་གསུང་སྙིང་པོ་དགུ་འཛབ་རྒྱུད། །སྐུ་ནི་པྲ་ཕུད་ལྷ་ཡི་སྐུ། །གསུང་ནི་བིང་ང་ཚངས་པའི་གསུང་། །ཐུགས་ནི་མུ་ཡེ་ཡེ་ཤེས་ཐུགས། །ཡོན་ཏན་ཉི་མ་ཀུན་འབྱུང་ཞིང་། །འཕྲིན་ལས་གར་མ་མཐོང་ཁྱབ་ཉིད། །དེ་བཞིན་སྐུ་གསུང་རྒྱུན་འཛབ་འདི། །འབུལ་ནི་རིགས་ལྔའི་ལྷ་ལ་[68]འབུལ། །བཞེས་ནི་གཉིས་མེད་ཐུགས་རྗེས་བཞེས། །དགོངས་ནི་འགྲོ་བའི་དོན་ལ་དགོངས། །སྐུ་ནི་མཚན་དང་དཔེ་བྱད་འབར། །གསུང་ནི་ཚངས་པའི་དབྱངས་ཀྱི་གསུང་། །ཐུགས་ནི་ཡེ་ཤེས་འོད་དུ་གསལ། །ཡོན་ཏན་ནོར་བུ་རིན་ཆེན་ཚུལ། །འཕྲིན་ལས་ཐོགས་མེད་ལྷུན་གྱིས་གྲུབ། །སྐུ་གསུང་ཡོན་ཏན་འཕྲིན་ལས་ལྔ། །མ་བརྩལ་ལྷུན་གྱིས་གྲུབ་པར་མཛད་དུ་གསོལ། །དེ་ནས་ཨ་དཀར་དགུ་འཛབ་བརྗོད། །ཨཱ་ཨ་དཀར་སལེ་འོད་ཨ་ཡང་ཨཱོྃ་འདུ། ཨཱོྃ་དབྱིངས་དང་ཡེ་ཤེས་མཁའ་ལ་མཉམ། [183]།ཐབས་དང་ཤེས་རབ་ཟུང་དུ་འབྲེལ། །སྐུ་ནི་མཚན་དང་དཔེ་བྱད་སྐུ། །གསུང་ནི་ཚངས་པའི་དབྱངས་ཀྱི་གསུང་། །ཐུགས་ནི་ཡེ་ཤེས་འོད་གསལ་ཐུགས། །ཡོན་ཏན་བདེ་ལེགས་ཀུན་འབྱུང་བ། །འཕྲིན་ལས་ཐོགས་མེད་ལྷུན་གྱིས་གྲུབ། །ལྷུན་གྲུབ་རང་བྱུང་བདེར་གཤེགས་སྟོང་། །དབྱིངས་སུ་གྲུབ་ཅིང་བདེར་གཤེགས་ཡེ་ཤེས་གསལ། །ཐབས་ལས་བྱུང་ཞིང་ཤེས་རབ་ཤར། །བདེར་གཤེགས་གཙོ་བོ་བཞི་རྣམས་ལ། །ཨ་དཀར་གསལ་བའི་དགུ་འཛབ་འབུལ། །ཕར་འཕྲོས་ཐུགས་རྗེས་འགྲོ་དོན་གྲུབ། །ཚུར་འདུས་རང་དོན་ལྷུན་གྱིས་གྲུབ། །གཉིས་མེད་རིག་པ་བྱང་ཆུབ་སེམས། །གཉིས་སུ་མེད་པ་གྲུབ་གྱུར་ཅིག །མཚན་མ་མེད་པ་གསལ་གྱུར་ཅིག ཨཱོྃ་ཨེ་ཀློང་ཁྱབ་བདལ་གསལ་བ་འོད་དུ་འདུས། །ཡུམ་གྱི་ཀློང་གི་དབྱིངས་སུ་འབུལ། །ཨཱ་ཨ་དཀར་སལེ་འོད་ཨ་ཡཾ་ཨཱོྃ་འདུ། །ཡེ་ཤེས་ལྷ་ཡི་ཐུགས་རྗེ་འབུལ། [184]།ཧ་མུ་ཡེ་ཨ་ཨ་ཨད་ཨད་ཡཾ་སྤུངས་འདུ། །ཐབས་ཀྱི་མཆོག་གི་རོལ་པར་འབུལ། །ཧོ་ལཾ་ལཾ་སྲུཾ་སྲུཾ་སལེ་ལྷན་ནེ་འདུ། །ཤེས་རབ་ཕུལ་གྱི་ངང་དུ་འབུལ། །ཨཱོྃ་ཡཾ་རཾ་ཁཾ་སྲུཾ། གཙོ་བོ་བཞི་དང་བདེར་གཤེགས་སྟོང་། །སྙིང་པོ་འཛབ་དགོངས་གསལ་གྱུར་ཤོག །དེ་ནས་ཨ་དཀར་དགུ་འཛབ་འབུལ། །ཨཱ་ཨ་དཀར་སལེ་འོད་ཨ་ཡཾ་ཨཱོྃ་འདུ། ཨཱ་ཨ་དཀར་སལེ་འོད་ཧ་ར་ཁི་ཁར་འདུ། ཨཱ་ཨ་དཀར་སལེ་འོད་ཐུགས་རྗེ་འོད་འདུ། ཨཱ་ཨ་དཀར་ཟེར་འཕྲོ་འདུ། ཨཱ་ཨ་དཀར་མུ་སྤུངས་འདུ། ཨཱ་ཨ་དཀར་གསལ་འོད་འདུ། ཨཱ་ཨ་དཀར་ཐིག་ལེ་འདུ། ཨཱ་ཨ་དཀར་སྤུངས་སོ་འདུ། ཨཱ་ཨ་དཀར་དྲི་མེད་འདུ། ཨ་དཀར་གསལ་བ་དགུ་འཛབ་འདི། །ཀུན་བཟང་བདེར་གཤེགས་ལྷ་ལ་འབུལ། །ཐུགས་རྗེས་འགྲོ་བའི་སྡུག་བསྔལ་སེལ། །བདག་དང་འགྲོ་དྲུག་སེམས་ཅན་རྣམས། །ཨཱ་དཀར་གསལ་བའི་ལམ་བགྲོད་ནས། །སྐྱེ་མེད་དཀར[ཀ][185]དག་གནས་མཆོག་ཏུ། །རང་བྱུང་སངས་རྒྱས་ཀུན་ཏུ་བཟང་། །འགག་མེད་ས་ལ་མངོན་རྫོགས་ཤོག །དེ་ནས་སྙིང་པོ་འཛབ་བསྟོད་དེ། །དེ་ནས་སྨོན་ལམ་གདབ་པ་ནི། ཨཱོྃ་ཞི་བར་[69]གྱུར་ཅིག་ཁྱབ་པ་བདུད་ཀྱི་སྡེ། །སྟོང་བར་གྱུར་ཅིག་འཁོར་བ་ངན་སོང་གསུམ། །དག་པར་གྱུར་ཅིག་སྡིག་པ་སྒྲིབ་པ་རྣམས། །བྱང་བར་གྱུར་ཅིག་ན་རག་སྡུག་བསྔལ་རྣམས། །འཕེལ་བར་གྱུར་ཅིག་དཀར་པོ་དགེ་བའི་ཚོགས། །དར་ཞིང་རྒྱས་པར་གྱུར་ཅིག་དུས་གསུམ་བདེར་གཤེགས་བཀའ། །མཐར་ཕྱིན་ཐོབ་པར་གྱུར་ཅིག་ཁམས་གསུམ་སེམས་ཅན་དང་། །སྒོས་བཙན་རྒྱལ་པོ་ཡོན་གྱི་བདག །སྤྱི་བཙན་མཐའ་ཡས་སེམས་ཅན་རྣམས། །བླ་མེད་དུས་གསུམ་བདེར་གཤེགས་དང་། །དབྱེར་མེད་གཅིག་ཏུ་གྱུར་ནས་ནི། །བླ་མེད་འབྲས་བུ་ཐོབ་པར་ཤོག །ཅེས་བརྗོད་ལྷ་རྣམས་བདག་ལ་བསྡུ། །དམིགས་མེད་ཐུགས་རྗེས་ཟིན་པར་བྱས། །བསྔོ་བ་བཀྲ་ཤིས་སྨོན་ལམ་དགའ་བདེ་བསྐྱེད། །དེ་ཚེ་འོལ་མོ་ལུང་དུ་ནི། [186]།གནས་པའི་གཤེན་པོ་གྲངས་མེད་པས། །ཐམས་ཅད་ཚོགས་རྫོགས་སྒྲིབ་བྱང་སྟེ། །མེ་ཏོག་ཆར་མང་མངོན་པར་བབས། །གཡུང་དྲུང་ལྷ་ཡི་བོན་མདོ་འདུས་པ་རིན་པོ་ཆེའི་རྒྱུད་ལས། བདེར་གཤེགས་ཀུན་འདུས་ཡོངས་སུ་རྫོགས་པའི་མཆོད་པ་ཞེས་བྱ་བ་གསང་བ་མདོ་སྡུད་ཀྱིས་བཀོད་པའི་ལེའུ་སྟེ་བཅོ་བརྒྱད་པའོ།། 

གངས་ཏི་སེ་བོན་གཞུང་རིག་མཛོད་ལྟར་སྐྲུན་པ།

ཤོག་གྲངས་ནི།

Bon Foundation བོན་བཀའ་འགྱུར་ལ་པོད་སུམ་བཅུ་པ་ནས། ཨང་ཀི་དམར་པོ། (Si khron zhing chen par khrun lte gnas par 'debs khang, Chengdu 1999)

གངས་ཏི་སེ་བོན་གཞུང་རིག་མཛོད་ལ་དེབ་དང་པོ་ནས། ཨང་ཀི་སྔོན་པོ། (Gangs ti se bon gzhung rig mdzod, Amdo 2009)

⋘ ● ⋙